ამერიკაში, ალიასკას შტატში მოღვაწე ქართველი დეკანოზი კონსტანტინე პაიჭაძე 90- იან წლებს და იმ საკითხებს იხსენებს, რომელთა მიმართაც ისეთივე სკეპტიკური დამოკიდებულება იყო, როგორიც დღეს გარკვეულ წრეებს ვაქცინაციის პროცესის მიმართ გააჩნიათ.
„მახსოვს 90-იანი წლების ბოლოს როგორ გამლანძღა ერთმა სასულიერო პირმა, როცა შეიტყო, რომ მობილური ტელეფონი მქონდა. მაშინ ზოგადად ამ ნივთის მიმართ მსგავსი რელიგიური ისტერია იყო ატეხილი, რომ sim ბარათი მასობრივი კონტროლის საშუალებას იძლევა და ეს ის ჩიპია რაც გამოცხადებაშიაო.
მაშინ ასე შემამკო მეგობარმა, შენ რადგან მობილური გაქვს კალენდრის ახალ სტილზე გადასვლასაც დათანხმდებიო. პარალელურად ეს საკითხიც აქტუალური იყო იმ დროს. ზუსტად 2 კვირის მერე აუწკრიალდა მობილური ჯიბეში და მახსოვს ჯერ შეცბა, მერე ხო არ ყოფილა მასეო,”- წერს დეკანოზი.
კონსტანტინე პაიჭაძე იხსენებს, როგორ ებრძოდნენ ადამიანები საბანკო ბარათებს, მოგვიანებით კი ბიომეტრულ პასპორტებს.
„მერე იყო და ასეთი კონტროლის მექანიზმი გამოჩნდა საბანკო ბარათებში… ცოტაც და ესეც ყველამ ჩაიდო ჯიბეში და მივიწყებული იქნა ესეც.
შემდეგი მასობრივი კონტროლის საშიშროება ID ბარათებსა და ბიომეტრულ პასპორტებში გამოჩნდა, რაც იმ დროში საკითხის მოწინაღმდეგეთა უმეტესმა ჩაიდო ჯიბეში და საკითხიც მიჩუმათდა.
ახლა აცრა…აქაც ალბათ ასე იქნება, ერთი ორი იმ კაცთაგანი რომ აიცრება ეს საკითხიც გადავა.
მეორე თვე დაიწყო, რაც დროებით დეაქტივაცია გავუკეთე ჩემს ფბ გვერდს, ახლახანს ისევ აღვადგინე, რამდენიმე ადამიანმა მომწერა ვაქცინის შესახებ…
არც ვაქსერი ვარ და არც ანტივაქსერი.უბრალოდ, მივედი და გავიკეთე აცრა. იმ განწყობით და დამოკიდებულებით, როგორც ვიკეთებ სისტემატიურად დიაბეტის დასარეგულირებელ წამალს,”- წერს დეკანოზი სოციალურ ქსელში.
კომენტარები