ამერიკის შეერთებული შტატების პრეზიდენტი, ჯო ბაიდენი, ABC-ის ეთერში ისაუბრა. ჯორჯ სტეფანაპოლუსთან ინტერვიუს დროს ამბობს, რომ ავღანეთიდან ჯარების გამოყვანა იყო “მარტივი არჩევანი” და მისი უფრო ეფექტურად შესრულება არ შეიძლებოდა.
პრეზიდენტი ამტკიცებს, რომ ვერავინ გათვლიდა თალიბანის ასეთ სწრაფ წინსვლას.
“ის აზრი, რომ თალიბანი ასე სწრაფად დაიკავებდა პოზიციებს… 300,000 ჯარისკაცი, რომელიც ჩვენ გავწვრთენით და აღვჭურვეთ, უბრალოდ, დაიშლებოდა და დანებდებოდა. არ მგონია, რომ ვინმეს ეს გაეთვალა”,- თქვა პრეზიდენტმა.
თუმცა, მიუხედავად ამისა, თალიბანის მიერ პოზიციების სწრაფმა გამყარებამ, ამერიკის მხრადაჭერილი ავღანეთის მთავრობის ჩამოშლამ და ჯარის გაუნებლყოფამ, ბევრი კითხვა გააჩინა ბაიდენის ადმინისტრაციის საგარეო პოლიტიკის გათვლებთან დაკავშირებით. ეს მაშინ, როცა პოლიტიკის ექსპერტები ვარაუდობდნენ, რომ სწორედ ეს სფერო უნდა ყოფილიყო ბაიდენი ძლიერი მხარე, ვინაიდან მან წლები იმუშავა სენატის საგარეო საქმეთა კომიტეტში და საგარეო პოლიტიკაში სხვა ლიდერებზე მეტადაა ჩახედული.
“ეს იყო ხელმძღვანელობის ჩავარდნა. ეს იყო ჩავარდნა წესიერად დაფიქრებასა და დაგეგმვაში”,- თქვა მაიკლ ოჰანლიმ, ბრუკინგსის ინსტიტუტის ექპერტმა.
ჯარების გამოყვანიდან რამდენიმე დღეში, ბაიდენი რეიტინგის 7%-ით დაეცა. “როიტერისა” და “იპსოსის” ერთობლივი კვლევის მიხედვით, პრეზიდენტის საქმიანობას ამერიკელების 46% აფასებს დადებითად. იმავე კვლევის მიხედვით, გასულ პარასკევს, ავღანეთში განვითარებულ მოვლენებამდე, ეს მაჩვენებელი 53% იყო.
ამერიკის კონგრესის რამდენიმე კომიტეტი, რომელთაც დემოკრატები უდგანან სათავეში, პირობას დებს, რომ პრეზიდენტ ჯო ბაიდენის ადმინისტრაციას შეკითხვებს დაუსვამს იმაზე, თუ რა მოხდა ავღანეთში და როგორ შეძლო თალიბანმა ქვეყნის ისე სწრაფად დაკავება, რომ ათასობით ამერიკელი და მათი დამხმარე ავღანელები უდიდესი საფრთხის წინაშე აღმოჩნდნენ.
ავღანეთში მიმდინარე მოვლენები აშშ-ის ვიცე-პრეზიდენტის, კამალა ჰარისის ტურნეს სამხრეთ აზიის ქვეყნებში, კიდევ უფრო აქტუალურს ხდის. მოგზაურობას ჰარისი დღეს იწყებს და ის მოიცავს ორ შეჩერებას, სინგაპურში და ვიეტნამში.
ორშაბათს, ჰარისი სატელეფონო საუბარს გამართავს სინგაპურის პრეზიდენტთან და ორმხირვ შეხვედრას გამართავს პრემიერ-მინისტრ ლი სიენ ლუნგთან. დაგეგმილია სიტყვით გამოსვლაც.
სამშაბათს, ვიცე-პრეზიდენტი ბიზნეს-ლიდერების შეხვედრაში მიიღებს მონაწილეობას და რეგიონში აშშ-ის ჩართულობის შესახებ სიტყვით გამოვა.
სწორედ ამის შემდეგ, ჰარისი ვიეტნამში გაემგზავრება. აშშ-ის ყოფილი ელჩი ვიეტნამში, დევდ შეარი ამბობს, რომ ვიცე-პრეზიდენტმა ვიზიტის ფარგლებში გაკეთებული გზავნილებისას სიფრთხილე უნდა გამოიჩინოს.
„ჩვენი ურთიერთობები ამ ქვეყნებთან თავისთავად მნიშვნელოვანია და მათ არ სურთ, აშშ-ჩინეთის საჭადრაკო თამაშში პაიკებად იყვნენ აღქმულნი. მათ საკუთარი დღის წესრიგი აქვთ და სურთ მათი ინტერესები განიხილებოდეს“ – ამბობს დიპლომატი.
ეს იქნება შესაძლებლობა, ვიცე-პრეზიდენტმა, საგარეო ვიზიტისას, კიდევ ერთხელ დაადასტუროს ამერიკული ღირებულებები პრეზიდენტ ბაიდენის ადმინისტრაციის ერთ-ერთი მთავარი პრიორიტეტი, – ადამიანის უფლებები. თალიბანის მიერ ავღანეთზე კონტროლის დამყარების შემდეგ, როცა ქალების მომავლის შესახებ შეშფოთებები არსებობს, ეს კიდევ უფრო მნიშვნელოვანია – აცხადებს ექსპერტთა ნაწილი.
ვიზიტის ფარგლებში ერთ-ერთი მნიშვნელოვანი საკითხი კოვიდ-პანდემიასთან გამკლავება იქნება. აშშ-მა სამხრეთ-აღმოსავლეთ აზიის ერების ასოციაციას უკვე მოაწოდა ვაქცინების 23 მილიონი დოზა. ასევე, ათობით მილიონი დოლარის ღირებულების სამედიცინო აღჭურვილობა და სხვა რესურსები, ვირუსთან საბრძოლველად.
წყარო – ამერიკის ხმა
კომენტარები