“გარდაცვლილ პირთა გაზრდილი რაოდენობა ობიექტურ დამკვირვებელში ქმნის იმის გონივრულ ეჭვს, რომ ჯანდაცვის სისტემა, შესაძლოა, კოვიდით დაინფიცირებულ პაციენტებს არაეფექტური მეთოდოლოგიით და არასათანადო მედიკამენტებით მკურნალობს.“,- ამის შესახებ საკონსტიტუციო სასამართლოს ყოფილი მოსამართლე, მაია კოპალეიშვილი სოციალურ ქსელში პოსტს აქვეყნებს.
ყოფილი მოსამართლე და ყველასთავის კარგად ცნობილი და გამოცდილი იურისტი სახელმწიფოს როლზე და პასუხისმგებლობაზე საუბრობს, რომელიც პაციენტების მკურნალობის ხარისხის კონტროლსაც მოიცავს.
“კოვიდ 19 – გარდაცვლილ პირთა დიდი რაოდენობის შესახებ:
საქართველოს კონსტიტუციის თანახმად, სახელმწიფო ვალდებულია აკონტროლოს ჯანდაცვის ყველა დაწესებულება და სამედიცინო მომსახურების ხარისხი (მუხ. 28.2). შესაბამისად, სახელმწიფო პასუხისმგებელია ხარისხიანი ჯანმრთელობის დაცვის მომსახურებაზე.
გარდაცვლილ პირთა გაზრდილი რაოდენობა ობიექტურ დამკვირვებელში ქმნის იმის გონივრულ ეჭვს, რომ ჯანდაცვის სისტემა, შესაძლოა, კოვიდით დაინფიცირებულ პაციენტებს არაეფექტური მეთოდოლოგიით და არასათანადო მედიკამენტებით მკურნალობს.
კერძოდ, როგორც ცნობილია, კოვიდ 19-ით გამოწვეული ჯანმრთელობის გართულებები ძალიან სწრაფად ვითარდება. მაგალითად ავიღოთ ფილტვების ანთება, რომლის დროსაც ფილტვების მაღალი პროცენტით დაფარვის შემთხვევაში ფატალური შედეგი დგება. როგორც სხვადასხვა პაციენტების მკურნალობის პროცესზე ინდივიდუალურმა დაკვირვებამ აჩვენა, მნიშვნელოვანია, რომ ანთების კერის გაჩენისთანავე კლინიკამ გამოიყენოს მაღალხარისხიანი, სწრაფი მოქმედების მედიკამენტი (მაგალითად, სხვადასხვა დასახელების მეოთხე თაობის ანტიბიოტიკი), რომ სწრაფად მოხდეს ანთების გავრცელების ბლოკირება.
პრაქტიკაში რა ხდება ამ მხრივ? ფაქტობრივ გარემოებათა და ინფორმაციათა ანალიზის შედეგად შეიძლება ითქვას, რომ ჯანდაცვა ფილტვების ანთების, ასევე ჯანმრთელობის სხვა გართულებების მკურნალობას უმრავლესად იწყებს მსუბუქი მედიკამენტებით, რაც, ბუნებრივია, არ არის ეფექტური კოვიდ 19-ით გამოწვეული გართულებებისას და ამასობაში, ფილტვების ანთება/რომელიმე ჯანმრთელობის გართულება იმდენად სწრაფად ვითარდება, რომ პაციენტის მართვა უკვე ძნელდება ან შეუძლებელი ხდება.
როგორც ვხედავთ, მკურნალობის ასეთი მეთოდი შესაცლელია. ასევე, ზემოთ აღნიშნული ობიექტურ დამკვირვებელში აჩენს გონივრულ ეჭვს, რომ კლინიკებში (როგორც დედაქალაქში, ასევე რეგიონებში) შესაბამისი მაღალხარისხიანი, სწრაფი/ეფექტური მოქმედების მედიკამენტები უმრავლესად არ არის ან იმდენად მცირე ოდენობითაა რომ კლინიკები მათ ფართო გამოყენებას ვერ ახდენენ.
სახელმწიფომ სათანადო გულისხმიერება უნდა გამოიჩინოს დასახელებული პრობლემის მოსაწესრიგებლად და ხარისხიანი ჯანდაცვის უზრუნველსაყოფად. შესაბამისმა საჯარო უწყებებმა საკმარისი კონტროლი უნდა განახორციელონ იმ მხრივ, რომ კოვიდ 19-ით დაინფიცირებული პაციენტების მკურნალობა თავიდანვე წარიმართოს სათანადო მაღალი ხარისხის/ეფექტური მედიკამენტებით“,- წერს მაია კოპალეიშვილი.
კომენტარები