ანი დვალიშვილი, ალია
ცხადია, რომ მთავარ აქცენტს „ოცნება“ უკვე მერამდენე წელია, სწორედ ფინანსებსა და ადმინისტრაციულ რესურსზე აკეთებს. სამაგიეროდ, მმართველი გუნდის ლიდერები მოგზაურობენ რეგიონებში სახელმწიფოს ხარჯზე. სამსახურის ავტომობილებში სახელმწიფოს ხარჯზე ნაყიდი ბენზინი, შეხვედრებზე – დასაქმებული ხალხის გამოყვანა და როცა საჭიროა, რეგულაციების დარღვევაც შეიძლება საჯაროდ და სახალხოდ, რისი ნათელი მაგალითიც პრემიერმინისტრმა პირადად გვიჩვენა, როცა ოლიმპიური ჩემპიონობის მისალოცად ათეულ მეტრზე გაჭიმულ სუფრას მიუჯდა ათეულობით ადამიანთან ერთად. მე იქ ვერც პირბადე დავინახე, ვერც დისტანცია და თავს დავდებ, ორიოდე საათს მერე, მთვრალი ხალხი სიყვარულს ერთმანეთს ჩახუტებითა და ტუჩზე კოცნით უხსნიდა.
„ოცნებაში“ უკვე ზეიმობენ სოლიდური სხვაობით მოგებას და 43%-ს კი არა, მინიმუმ 63%-ის მიღებას ვფიქრობთო. თან ისიც გაითვალისწინეთ, რომ მთავრობის მიერ მუნიციპალიტეტების განვითარებისთვის გამოყოფილი 500 მილიონი ლარით ინფრასტრუქტურული პროექტები არ დაწყებულა, ტენდერები 20 აგვისტოდან გამოცხადდება, რადგან სამუშაოები 10-15 სექტემბრიდან გახურდეს, ანუ 2 ოქტომბრისთვის ყველა მუნიციპალიტეტში სამშენებლო ბუღი იდგება და ეს ამომრჩეველზე აუცილებლად იმოქმედებსო, ასე ვარაუდობენ. ფაქტია, ეს 500 მილიონი პირდაპირ წინასაარჩევნო კამპანიის საწარმოებლად იქნა მოძიებული, მაგრამ ისე „ლამაზად“, რომ ვერავინ მიედავება.
მერობის კანდიდატების დასახელების შემდეგ, „ოცნებას“ თითქოს შიდა დაპირისპირება უნდა დაესრულებინა, მაგრამ ახლა საკრებულოს სიებზე მიდის „ჭიდაობა“. სიტუაცია იმდენად არის გამწვავებული, რომ პრაქტიკულად ყველგან, შედგენილია სიები, საიდანაც ცესკოში დარეგისტრირებამდე არაერთი ადამიანი უბრალოდ ამოვარდება. მათ ახლა აჩერებენ და ეუბნებიან, რომ სიაში იქნებიან, მაგრამ რეალურად, ისინი ყველაფრის გარეშე რჩებიან. ზედ წინასაარჩევნოდ სხვაგან გადახტომას კი არც ეფექტი ექნება და ამ ადამიანებსაც მარტივად გააშავებენ, აქაოდა, სიაში რომ ვერ მოხვდნენ, იმიტომ გაიქცნენ სხვაგან, თორემ ჩვენ კარგები ვართო.
მიმდინარე კვირიდან „ოცნება“ მერობის კანდიდატების წარდგენას უკვე მუნიციპალიტეტებში დაიწყებს. ყველა მერს პირადად წარადგენს პრემიერი და პარლამენტის თავმჯდომარე, რათა ეს ყველაფერი სოლიდურად გამოიყურებოდეს. ასევე, ვიზიტისას აქტივს ექნება შესაძლებლობა, თუ რაიმე პრობლემა არსებობს, პარტიის ლიდერებს პირადად მიაწოდონ და წესით, მათ რეაგირება არ უნდა დააყოვნონ. აქტივის შენარჩუნება და გამხნევება ახლა პარტიის მთავარი ამოცანაა, რადგან მათ უკმაყოფილებას მერობის ათამდე კანდიდატი იწვევს, რომლებზეც ღიად ამბობენ, რომ თავის დროზე „მამალი ნაციონალები“ იყვნენ და არც თუ შორეულ წარსულში (მაგალითად, 2016 წლის საპარლამენტო არჩევნების დროს) კენჭს სწორედ ნაციონალების სახელით იყრიდნენ, ახლა კი „ოცნების“ კანდიდატები არიან. თუმცა, გვერწმუნეთ, მმართველი გუნდის აქტივი ამასაც აიტანს, უარესები აუტანია და წარბიც არ შეუხრია სინდისის ძაფგაწყვეტილ შუბლზე.
კომენტარები