“სააკაშვილმა რუსეთიდან მომავალი ვერც ერთი საფრთხე ვერ აარიდა ქვეყანას, მისი ფორთხვა არასდროს დაგვავიწყდება” – ლევან ლორთქიფანიძე

პოლიტოლოგი, ლევან ლორთქიფანიძე:

“ყოველ წელს რატომ გვიწევს ერთი და იმავე საკითხებზე მსჯელობა? ერთი და იმავე არგუმენტების მოხმობა? ერთი და იმავე სისულელეებისთვის პასუხის გაცემა?

არ შეიძლება შევთანხმდეთ ორ-სამ თეზისზე?

რუსეთი ოკუპანტია, დამპყრობელია. მის ინტერესებში არ შედის ფედერაციის სამხრეთ საზღვართან დამოუკიდებელი და ერთიანი საქართველოს არსებობა. მზად არის (და ეს ბევრჯერ გაუკეთებია) ჩვენი ქვეყნის დამოუკიდებლობის, ერთიანობის შელახვის მიზნით ფეხქვეშ გათელოს საერთაშორისო სამართალი, ჩვენი სუვერენიტეტი, დაიწყოს ომი. რუსეთის არის საფრთხე და უბედურება ჩვენი ქვეყნისთვის.

2006-2008 წელს საქართველოს მთავრობა ატარებდა ანტისახელმწიფოებრივ, მილიტარისტულ, არარაციონალურ პოლიტიკას საქართველოს კონფლიქტურ რეგიონებთან მიმართებით. დანაშაულებრივმა და უპასუხისმგებლო პოლიტიკამ გაუადვილა მტერს ჩვენი ხალხის ამოხოცვა. ომის დროს ხელისუფლების უთავბოლობამ და არაორგანიზებულობამ უამრავი ადამიანის ისედაც ტრაგიკული ბედი, კიდევ უფრო გაამრუდა. სააკაშვილმა რუსეთიდან მომავალი ვერც ერთი საფრთხე ვერ აარიდა ქვეყანას. მისი ფორთხვა არასდროს დაგვავიწყდება.

მტერს უნდა ვიცნობდეთ! საქართველოს მთავრობისა და კრემლთან კავშირის არმქონე ფონდების დახმარებით უნდა მიდიოდეს რუსეთის პოლიტიკის, კულტურის, საზოგადოების ინტენსიური კვლევა, რათა ვაწარმოოთ უფრო გონივრული, ცოდნაზე დაფუძნებული საგარეო პოლიტიკა; რათა განათლების სისტემის საშუალებით ხალხში გავავრცელოთ ცოდნა მეზობელი ქვეყნიდან მუდმივად მომავალი საფრთხის შესახებ და არა ისტერიკა! წავახალისოთ დისკუსია საშიშროების თავიდან აცილების კონკრეტული მექანიზმების შესახებ (სტრატეგიული მიზანი დეკლარირებული გვაქვს კონსტიტუციით, ტაქტიკურად რას ვაკეთებთ?).

პირველ ეტაპზე გამოსაცემია “ოქსფორდისა” და “რუთლიჯის” სახელმძღვანელო კრებულთა (Handbook) მსგავსი წიგნი თანამედროვე რუსეთის შესახებ, რათა ადამიანებმა უფრო ზუსტად იცოდნენ მტრის ანატომია.

დიდი მადლობა გმირებს, რომლებმაც ფრონტის ხაზზე თავი დადეს ჩვენთვის და ამ ქვეყნისთვის.

დაღუპულთა სისხლი ცას შეჩუხჩუხებს და სამართალს ითხოვს.

სამართლის მიღწევას კი კვლევა, შრომა, სიმშვიდე, თანმიმდევრულობა სჭირდება. ნასკები, კვერცხები, მტრის უკან შეძრომა ან მთელი ტვირთის მხოლოდ პარტნიორებზე დაკისრება გამოსავალი არ არის!”