უკრაინის პოლიციამ ქართულ რესტორანში მოსასმენი აპარატურა დააყენა – რა აღმოჩნდა ფარულ ჩანაწერებში

უკრაინაში გრძელდება გამოძიება, რომელიც გავლენიან ქართველ „კანონიერ ქურდთან“, ლაშა ჯაჭვლიანთან კავშირებს ააშკარავებს.

ჯაჭვლიანი, იგივე „ლაშა სვანი“ კიევში მიმდინარე წლის მაისში დააკავეს. მასთან ერთად დააპატიმრეს კიდევ ერთი „კანონიერი ქურდი“ სერგეი ოლეიკინი, მეტსახელად „უმკა“. მათ კრიმინალური დაჯგუფების ხელმძღვანელობა და ქურდული სამყაროსთვის დიდი ოდენობით თანხების მობილიზება ედებათ ბრალად.

როგორც ცნობილია, ოლეიკინი “კანონიერ ქურდად” 2014 წლის თებერვალში სანქტ-პეტერბურგში „მონათლეს”. ლაშა ჯაჭვლიანი კი „კრიმინალური სამყაროს“ წევრი 1995 წელს გახდა. ამჟამად გამოძიება იკვლევს მათ კავშირებს რამდენიმე კომპანიასთან, მათ შორის არის შპს “ჰავანა ცენტრი”, შპს “მისტოპროექტი დნიპრო” და შპს “რუბიკონ -7″.

ყველა ამ კომპანიაში უკრაინელმა სამართალდამცველებმა ჩხრეკა ჩაატარეს. სამივე კომპანიის უმსხვილესი აქციონერები არიან ლაშა ჯაჭვლიანთან დაახლოებული ბიზნესმენები – ხორცის გადამამუშავებელი ქარხნის თანამფლობელი ვიაჩესლავ კაპუსტინი და ალექსანდრე პეტროვსკი. ასევე ცნობილი ხდება, რომ ქურდული საერთოსთვის თანხების მობილიზება ხდებოდა დნეპრში სტაროკოზაცკაიას ქუჩაზე მდებარე რესტორან “გურიაში”. ამ ქართულ რესტორანში სამართალდაცვლებმა მოსასმენი აპარატურა დააყენეს. ფარულ ჩანაწერებში აისახა „ლაშა სვანსა“ და „უმკას“ შორის გამართული რამდენიმე შეხვედრა, სადაც მათ კრიმიანლური საქმიანობის დეტალები განიხილეს. ეს ჩანაწერები ახლა საქმეში ერთ-ერთ მთავარ მტკიცებულებას წარმოადგენს.

ერთ-ერთი ჩანაწერის თანახმად, 2021 წლის 23 იანვარს ქართულ რესტორან „გურიაში“ გამართული საუბრისას „კანონიერმა ქურდებმა“ დაამტკიცეს თაღლითური სქემის პირობები, რომლის მოქმედების არეალი იქნებოდა მთელი პოსტსაბჭოთა სივრცე, თუმცა არა უკრაინა.