აშშ-ის დაავადებათა კონტროლის ცენტრის დირექტორი: იშვიათ შემთხვევებში, სრულად ვაქცინირებულ ადამიანებს კორონავირუსის „დელტა“ ვარიანტის გავრცელება შეუძლიათ

აშშ-ის დაავადებათა კონტროლისა და პრევენციის ცენტრის (CDC) დირექტორმა, როშელ ვალენსკიმ განაცხადა, რომ იშვიათ შემთხვევებში, სრულად ვაქცინირებულ ადამიანებს კორონავირუსის „დელტა“ ვარიანტის გავრცელება შეუძლიათ.

„რამდენიმე შტატიდან და სხვა ქვეყნებიდან „დელტა“ ვარიანტის შესახებ მიღებული ინფორმაცია იმაზე მიუთითებს, რომ იშვიათ შემთხვევებში, „დელტა“ ვარიანტით ინფიცირებული ზოგიერთი ვაქცინირებული პირი ვაქცინაციის შემდეგ შეიძლება ინფექციის გადამდები იყოს და ვირუსი სხვებს გადასცეს. ეს ახალი მონაცემები შემაშფოთებელია“, – აღნიშნა აშშ-ის დაავადებათა კონტროლისა და პრევენციის ცენტრის დირექტორმა.

როშელ ვალენსკის თქმით, დაავადებათა კონტროლისა და პრევენციის ცენტრის გამოკვლევებმა დაადგინა, რომ „დელტა“ ვარიანტით ინფიცირებულ ვაქცინირებულ ადამიანებში ვირუსის რაოდენობა „დელტა“ ვარიანტით ინფიცირებულ არავაქცინირებულ ადამიანებში გამოვლენილი ვირუსის რაოდენობის მსგავსია.

„ეს მიუთითებს იმაზე, რომ ვაქცინირებულ პირებს ადვილად შეუძლიათ ვირუსის გადაცემა მაშინაც კი, თუ მთლიანობაში იშვიათად ავადდებიან. ამასთანავე, ვირუსის გადაცემის აბსოლუტური უმრავლესობა, მძიმე დაავადებების, ჰოსპიტალიზაციისა და სიკვდილიანობის დიდი ნაწილი თითქმის მხოლოდ არავაქცინირებულ ადამიანებში ხდება“, – აღნიშნა მან.