აშშ-ში მცხოვრები ჟურნალისტი, დემნა დევდარიანი, “ფეისბუქის” გვერდზე წერს, რომ ღარიბაშვილის ვიზიტი აშშ-ში ჩაიშალა.
ჟურნალისტი აღნიშნავს, რომ შეხვედრის გაუქმების ერთ-ერთი მიზეზი კონგრესმენების მხრიდან, შეხვედრებისადმი გამოხატული ნულის ტოლი ინტერესი გახდა:
“ირაკლი ღარიბაშვილი ამ კვირაში აქ, ვაშინგტონში უნდა ყოფილიყო სახელმწიფო ვიზიტით და შეხვედროდა კონგრესმენებს, სახ. დეპის დიპლომატებს და ჩვეულებისამებრ, უნდა შეევლო ჰიუგო ბოსის ლოკალურ მაღაზიაშიც.
დაგეგმილი ვიზიტი ვაშინგტონში ჩაიშალა, რისი ერთ-ერთი მიზეზიც, კონგრესმენების მხრიდან, შეხვედრებისადმი გამოხატული ნულის ტოლი ინტერესი გახდა. კონგრესმენი კინზინგერი ერთ-ერთი იყო, ვინც უარი თქვა ღარიბაშვილთან შეხვედრაზე”
დემნა დევდარიანი კონგრესმენ კინზინგერის ტვიტერის პოსტსაც აკოპირებს, რომელშიც მან ირაკლი ღარიბაშვილს უპასუხა.
“ეს სრულიად სიყალბეა. ჩვენ კრიტიკულები ვიყავით და ხშირად. როგორც ჩანს, ახლა პროგრესი შენელდა და საქართველოს მთავრობა ღიად არღვევს შეთანხმებებს”
სენატორმა ადამ კინზინგერმა პრემიერ ღარიბაშვილის იმ განცხადებას უპასუხა, რომელშიც მან თქვა, რომ 2012 წლამდე არ მოუსმენია ამერიკისა და ევროპის კრიტიკული შენიშვნა იმდროინდელი სასამართლოს მიმართ.
მთავრობის ადმინისტრაციის პრესსამსახურის განმარტებით, პრემიერ-მინისტრის ვიზიტი აშშ-ში დაგეგმილი არ ყოფილა და სრული სპეკულაციაა იმის მტკიცება, თითქოს პრემიერის დაგეგმილი ვიზიტი აშშ-ში ჩაიშალა.
ამის შესახებ პრემიერ-მინისტრის პრესამსახურის მიერ გავრცელებულ განმარტებაშია ნათქვამი.
„გვსურს განვმარტოთ, რომ აშშ-ში პრემიერ-მინისტრის ვიზიტი დაგეგმილი არ ყოფილა. ცალკეული პირების მიერ გავრცელებული ინფორმაცია წარმოადგენს სიცრუეს და მიზანმიმართულ დეზინფორმაციას. პრემიერ-მინისტრის ვიზიტების შესახებ ინფორმაციას პრესსამსახური წინასწარ ავრცელებს. ამ შემთხვევაში კი მსგავსი რამ არ ყოფილა, შესაბამისად, სრული სპეკულაციაა იმის მტკიცება, თითქოს პრემიერის დაგეგმილი ვიზიტი აშშ-ში, ჩაიშალა“, – განაცხადეს მთავრობის პრესამსახურში.
ადამ კინგიზერი, სოციალურ ქსელში ეხმაურება გვარცელებულ ინფორმაციას და წერს:
“ამ კვირაში ვაშინგტონში არ ვიმყოფებით და ამიტომ ეს შეხვედრა ვერ გაიმართებოდა“
კომენტარები