რა ურჩია დაავადებათა კონტროლის ცენტრმა და ჯანდაცვის სამინისტრომ პრემიერის და ვის უსმენს სინამდვილეში ღარიბაშვილი?

დღეიდან 22 ივნისიდან, მოიხსნება პირბადის ღია სივრცეში ტარების ვალდებულება და პირველი ივლისიდან იხსნება კომენდანტის საათი.

რა უძღოდა წინ დღევანდელ გადაწყვეტილებას, როგორც ყოველთვის „ალია“ ახლაც რამდენიმე ფაქტს გთავაზობთ:

21 ივნისი, ამირან გამყრელიძე:

 “დაავადებათა კონტროლის ეროვნული ცენტრი ჯერჯერობით არ მიიჩნევს მიზანშეწონილად პირბადის ხმარების მოხსნას. მესმის, რთულია, ზაფხულია, მაგრამ საქართველოსთვის 300-700 შემთხვევა საკმაოდ დიდი რაოდენობაა. ჯერ უნდა გავიჭირვოთ და პირბადე უნდა ვატაროთ…”

21 ივნისი, ჯანდაცვის მინისტრის მოადგილე, თამარ გაბუნია:

„ჩვენთვის ყველაზე ქმედით შეზღუდვად კვლავაც ღამის საათებში მოძრაობის შეზღუდვა და ასევე პირბადის გამოყენება რჩება. პირბადის გამოყენება კვლავ ძალიან მნიშვნელოვანი ინსტრუმენტია და ვიდრე ვაქცინაციით მოსახლეობის სულ მცირე 30%-ს არ მოვიცავთ, მანამდე პირბადის გამოყენების ვალდებულების შემსუბუქებაზე საუბარი ნაადრევია“

როგორც ჩანს, ნაადრევი საუბარი მაინც შედგა, თუ, იქნებ, მოსახლეობის 30 პროცენტი ავცერით უკვე და არ ვიცით?

რაში სჭირდება ერთ კაცს საბჭო, პრემიერო? არც დაავადებათა კონტროლის ცენტრის და არც ჯანდაცვის სამინისტროს რეკომენდაციას თუ არ ითვალისწინებთ და ერთპიროვნულად წყვეტთ, რად უნდა ერთ კაცს საბჭო?

უცნაური ისაა, რომ აქამდე ყველა გადაწყვეტილებას ეპიდემიოლოგებს აბრალებდით, რა ვქნა, ისინი ასე ამბობენ და მე რა შემიძლიაო და შეგძლებიათ კი არა, თქვენ შეგძლებიათ, თუ შეგძლებიათ!

აქვე შეგახსენებთ, პრემიერო, 27 წლის გარდაცვლილი ექთნის, მეგი ბაქრაძის საქმის გამოძიება დააჩქარებინოთ, იქნებ, რაკი ამდენი შეგიძლიათ, თორემ, უკვე დაიწყო საუბარი იმაზე, რომ სწორედ ის ვაქცინა შეწყდა ქვეყანაში, რომელი ვაქცინის გაკეთების შემდეგაც, როგორც ოფიციალური, წინასწარი მონაცემითაა ცნობილი, ანაფილაქსიური შოკით გარდაიცვალა მეგი! ასე რომ, ნუ დაუშვებთ მეტ მითქმა-მოთქმას.

შეგახსენებთ პრემიერო, წმინდა სინოდმა კითხვა დაგისვათ, იმ შემთხვევაში, თუ ვაქცინაციის გართულებით პრობლემა შეექმნება რომელიმე მოქალაქეს, ვინ იქნება პასუხისმგებელი? – იქნებ უპასუხოთ, რა ტიპის პასუხიმგებლობას იღებს ქვეყანა და როგორ მიხედავს, რა კომპენსაციას გადაუხდის იმ ადამიანებს, ვისაც ალერგიული შეტევა ჰქონდა? ან რამე სხვა ტიპის გართულება?

პრემიერო, რაკი ამდენი შეგიძლიათ, იქნებ, გამყრელიძესა და ტიკარაძეს უბრძანოთ, დროულად განათავსონ სტატისტიკური მონაცემი და მეტი დეტალებით, თუ შეიძლება.

პრემიერო, თუ ამდენი შეგიძლიათ, მოსახლეობისთვის საჭირო ოდენობის ვაქცინა რომ არ გვაქვს ქვეყანაში, ეგაც თქვენი „დამსახურებაა“? ექსპერტები რომ ამბობენ, ჩინური ვაქცინების ეფექტურობა ნაკლებიაო და არავინ ყურს არ უგდებს, ეგაც თქვენ გეხებათ?

მეოთხე ტალღას რომ ველოდებით, ისე რომ ვაქცინაციის პროცესი არც კი მიიზლაზნება, ამაზეც თქვენ იქნებით პასუხისმგებელი?

პრემიერო, დავით გარეჯის შესახებ რა ხდება?

ბადრი ესებუა თქვენ ჩაგბარდებათ, პრემიერო?

და ა.შ. და ა.შ.

ერთ-ორ ჭორსაც მოგიყვებით ბარემ, ამბობენ, პრემიერმა დღეს შეზღუდვები იმიტომ მოხსნა, რომ ქვეყანაში ვაქცინაციის შეფერხების სამარცხვინო ფაქტი გადაეფარაო და ეგ რა არის, იმასაც ამბობენ, ბორჯომში, უმრავლესობის შეკრებაზე ისეთები მოხდა, შეზღუდვები კი არა, ლამისაა კაბინეტების კარები დაუხსნას ყველასო და მართალია?

თამო კეშელავა, ალია