“21 თვეა ზუსტად რაც გადაადგილება გვაქვს შეზღუდული და მოსახლეობა ზუსტად განახევრდა”

სოციალური ქსელის მომხმარებელი თამარ მეარაყიშვილი ფეისბუქზე პოსტს აქვეყნებს:

“ხვალ ერგნეთში ინციდენტების პრევენციისა და მათზე რეაგირების მექანიზმის მორიგი შეხვედრა გაიმართება.
ესაა ჩემი მიმართვა

მივმართავ განსაკუთრებულად ეუთოს გენერალურ მდივანს ჰელგა მარია შმიდტს, რომელიც ხვალ შეხვედრაში მიიღებს მონაწილეობას

6 თვეა გადაადგილების შემსუბუქებული რეგულაციები მოქმედებს და ეს ნამდვილად შველაა ადგილობრივებისთვის, მაგრამ არა საკმარისი. ადამიანები აქ აღარ კვდებიან მხოლოდ იმიტომ, რომ ექიმთან არ გაუშვეს- ესაა შეღავათი მხოლოდ. აღნიშნული რეგულაციით მოსარგებლეები რიგ შემთხვევებში რაიონის დატოვების მიზნით იყენებენ ასეთ საშუალებას. 21 თვეა ზუსტად რაც გადაადგილება გვაქვს შეზღუდული და მოსახლეობა ზუსტად განახევრდა.
იცით, რას ვეკითხებით ყოველდღე შეხვედრისას?- “რამე ჰო არ გაიგე გზის გახსნაზე?”
ემოციებიც გამომელია. ვეღარ ვწერ. მენატრება ჩემი ერთადერთი შვილი- ორი წელია არ მინახავს. რომ ვნახო, მძიმედ ავად უნდა გავხდე, მივმართო გადაადგილების თხოვნით, ან უნდა მოვკვდე და შვილს შემოუშვებენ გამოსამშვიდობებლად. თუ ასე მოხდა, ჩემი მშობლები გაიხარებენ- უსაზღვროდ მონატრებულ ერთადერთ შვილიშვილს ნახავენ.
შეგიძლიათ წარმოიდგინოთ ჩვენი განცდები? თუ შეგიძლიათ დაგვეხმარეთ, გთხოვთ.
გზა გვინდა თავისუფალი გადაადგილებით.”