რაში იყენებს ღარიბაშვილი და “ოცნება” ძალოვნებს? – “ენმ”-ის განცხადება

“ერთიანი ნაციონალური მოძრაობის” ინფორმაციით, სამეგრელო-ზემო სვანეთის პოლიციის უფროსად, გიგა ზესაშვილი ინიშნება. პარტიაში ამბობენ, რომ ზესაშვილი ყველა არჩევნების დროს განსაკუთრებული აგრესიით გამოირჩეოდა, ამასთან ის მონაწილეობას იღებდა 20 ივნისის აქციის დარბევაში. მათივე თქმით, ზესაშვილი პრემიერ ირაკლი ღარიბაშვილთან დაახლოებული პირია.

როგორც “ნაციონალურ მოძრაობაში” ამბობენ, მსგავსი საკადრო ცვლილებებით დასტურდება, რომ  მმართველი გუნდი თვითმმართველობის არჩევნებისთვის ემზადება და ძალოვან უწყებებს საკუთარი ინტერესებისთვის გამოიყენებს.

“ახლა საოლქო საარჩევნო კომისიები საზღვრების დადგენის პროცედურას იწყებენ, ეს პროცედურა ჯერ გავლილი და დასრულებული არ არის, ის 1-ლ ივლისამდე უნდა დასრულდეს. ახლა მთელი ქვეყნის მასშტაბით, პოლიციის უფროსები, არაფორმალურად, ამ საზღვრების დადგენაში ჩაერთვებიან, რომ ისე დაადგინონ ეს საზღვრები, როგორც ეს ქართულ ოცნებას აწყობს”,- ამბობს ენმ-ს წევრი ანა წითლიძე.

წყარო – “მთავარი”