(ვიდეო) – არ აქვს ნიშან-წყალი კაცობის… ჩასული იყო ლიდერთან და დასჯილი ბავშვივით უსმენდა – ირაკლი კობახიძე

“ქართული ოცნების” თავმჯდომარე, ირაკლი კობახიძე, ოპოზიციური ლიდერის, ნიკა მელიას სიტყვით გამოსვლის შემდეგ, ამბობს:

“მადლობას ვუხდი კოლეგებს მოთმინებისთვის, ისინი 15 წუთის განმავლობაში კრიმინალისგან ისმენდნენ თითის ქნევას დ ამუქარას.

პატივი ვეცით პარლამენტს, მაგრამ ძნელი მოსათმენია, როცა ასეთ რამეებს ისმენენ ადამიანისგან, რომელიც არის კონკრეტულ დანაშაულში ბრალდებული, ეს არის ადამიანი, რომელსაც არ აქვს არავითარი ნიშან-წყალი კაცობის და ამას უკავშირდება ის დანაშაულებებიც, რომელიც მის მიერ არის ჩადენილი, ეს არის ადამიანი, რომელიც ცოტა ხნის წინ ჩასული იყო პოლიტ. პარტიის ლიდერთან და დასჯილი ბავშვივით უსმენდა. საზოგადოება ყველაფერს გასცემს სათანადო პასუხს.

არ გადავიხდი და ვერ დამიჭერთო, ამბობდა, გახსოვთ, არ გადაიხადა და დაიჭირეს, ვერ უშველა, ვერც შინაურმა და ვერც გარეულმა, ვერც გახარიამ და ვერც გვარამიამ. ვერ გადამიხდით, არ გამოვალო, ამბობდა, დათანხმდა, გადახდევინა და გამოვიდა.

ხატია დეკანოიძე ამბობდა, ამ პარლამენტში შესასვლელად არავინ გვემეტება, როგორც ხედავთ თავი გაიმეტა და შემოვიდა.

თაკო ჩარკვიანიც – ამ უღირს პარლამენტში ფეხის შემდგმელი არ ვარ და ისიც არის ჩვენი სტუმარი.

99,9 პარლამენტში ვერ და არ შევალთ – ნიკანორ მელია – როგორც ხედავთ, ხანდახან 0,1 პროცენტიც მუშაობს.

როგორც ხედავთ, მოუწიათ პარლამენტში შემოსვლა და ეს არის ჩვენი და საზოგადოების დამსახურება. ამ ხალხმა ვერც ერთი თავისი სიტყვა ვერ შეასრულა, მინდა მივმართო ნაციონალებს, როგორც სხვა სიტყვების უკან წაღება მოგიწიათ, ზუსტად ასევე მოგიწევთ შარლ მიშელის დოკუმენტზე ხელის მოწერა და ამნისტიის კანონის მიღება.