რასაც ჰყვება რეანიმატოლოგი, მან ყველაფერი გააკეთა. მე მასზე მეტს ვერ გავაკეთებდი, ნამდვილად! მან ძალიან კარგად იცის, როგორ მართოს კლინიკური პაციენტი, – ამის შესახებ პირველი საუნივერსიტეტო კლინიკის ხელმძღვანელმა ლევან რატიანმა მეგი ბაქრაძის სიცოცხლის გადასარჩენად დასმულ შეკითხვაზე განაცხადა.
კითხვაზე, რამდენად ჰქონდა იმედი, რომ მეგი ბაქრაძის სიცოცხლეს გადაარჩენდა, რატიანმა განაცხადა, რომ მან იცოდა, პაციენტი რამდენიმე საათში დაიღუპებოდა.
მისივე თქმით, როდესაც აღნიშნულ ფაქტზე საგანგებო სამსახურმა დაურეკა და უთხრეს, რომ მას პაციენტი უნდა მიეღო, უარი განუცხადა
„არ მინდოდა, ამ ტკივილის მიღება, რასაც ახალგაზრდა მედპერსონალის შენს კლინიკაში გარდაცვალება წარმოადგენს“, – დასძინა რატიანმა.
მისივე განცხადებით, ოჯახს იმედი ჰქონდა, რომ პაციენტი თუ მათ კლინიკაში მოხვდებოდა, იგი აუცილებლად გადარჩებოდა.
„რომ გავსინჯე, მივხვდი, რომ იქ სიცოცხლე რამდენიმე საათში დასრულდებოდა. ავუხსენი კიდევაც მეუღლეს. ეს ძალიან ძნელი აღსაქმელია. ჯერ პირველ რიგში, ის, რომ უნდა უთხრა პატრონს აუცილებლად და მეორე, რომ უძლური ხარ. ეს ძალიან იშვიათად ხდება ექიმის ცხოვრებაში. როდესაც პაციენტს სინჯავ და იქვე ხვდები, აქ არაფერი გამოვა. ეს იყო მისი კლინიკური მდგომარეობა. საავადმყოფოში შემოსვლიდან 15 წუთში გავსინჯე პაციენტი და იქვე ჩავწერე ჩანაწერში, რომ სიცოცხლე რამდენიმე საათში სიკვდილით დასრულდებოდა. ეს იყო სიცოცხლესთან შეუთავსებელი მდგომარეობა. ეს მთელი ქვეყნის ტრაგედიაა“, – აღნიშნა რატიანმა.
მისთვის უცნობია, ვისი ბრალი იყო მეგი ბაქრაძის გარდაცვალება. რატიანი მიიჩნევს, რომ ეს ბედისწერა იყო.
„ამის თქმით უფლება მექნებოდა, მე რომ მოვლენას შევსწრებოდი, მაგრამ მე ის მოვლენა მხოლოდ მონათხრობით ვიცი, რაც იქ მოხდა. ვისი ბრალი იყო, რისი ბრალი იყო – ეს ჩემი განსასჯელი არ არის“, – განაცხადა რატიანმა.
კომენტარები