მარინა ჯანაშიას კოლეგებმა, მსახიობებმა – რეზო ჩხიკვიშვილმა და ლევან უჩანეიშვილმა, რომლებიც საქართველოში არ იმყოფებიან, გამოსამშვიდობებელი წერილი გამოაქვეყნეს.
„ჩვენო ძვირფასო მარინა, მას შემდეგ, რაც მე და ლევანმა ეს საშინელი ამბავი გავიგეთ, ვცდილობთ ყოველ დღე ერთმანეთი ვანუგეშოთ და გავაძლიეროთ, მაგრამ, სამწუხაროდ, არ გამოგვდის. ორივეს ძალიან გვიჭირს, ძალიან ძნელია იმის გააზრება, რომ შენ ჩვენს გვერდით აღარა ხარ, ვერ ვეგუებით ამ მწარე სიმართლეს. ვიხსენებთ შენთან გატარებულ დღეებს, წუთებს, თეატრსა თუ კინოში, რისი ბედნიერებაც ორივეს გვხვდა წილად. ეს იქნებოდა „თეთრი კურდღელი“, „ოტელო“, „კუკარაჩა“ თუ „ევრიდიკე“. ვცდილობთ, გვინდა, რომ ხმა მოგაწვდინოთ და იმედია, სადაც ხარ და იქნები, მაინც გაიგებ ჩვენი გულიდან ნათქვამ სიტყვებს, რომ ძალიან გვიყვარხარ და მუდამ გვეყვარები, სანამ ამქვეყნად ვიქნებით, ჩვენო ლამაზო, ნიჭიერო, უსათნოესო, კეთილშობილო, სულით ხორცამდე ჭეშმარიტო ხელოვანო, მსუბუქი ყოფილიყოს შენთვის ჩვენი, ქართული მიწა“, – ვკითხულობთ წერილში.
მარინა ჯანაშიას მახათას მთაზე, საზოგადო მოღვაწეთა პანთეონში დღეს დაკრძალავენ. მსახიობს 14:00 საათზე, რუსთაველის ეროვნული თეატრიდან გამოასვენებენ.
მარინა ჯანაშია 71 წლის ასაკში, 27 მაისს გარდაიცვალა.
კომენტარები