თბილისის საქალაქო სასამართლოში ამ წუთებში ნიკა მელიას პროცესი იწყება. მიმდინარეობს მტკიცებულებების გამოკვლევის ეტაპი. წინა პროცესზე ბრალდების მხარემ 20-21 ივნისის მოვლენების ამსახველი ვიდეო მტკიცებულებები წარადგინა.
დაცვის მხარე წარდგენილ მასალას კონტექსტიდან ამოვარდნილად მიიჩნევს და კიდევ ერთხელ საუბრობს საკუთარ პოზიციაზე, რომ ნიკა მელიას მხრიდან ძალადობრივი ქმედება არ ყოფილა. თავად მელია სხდომას ამჯერადაც არ დაესწრება.
ნიკა მელიას ადვოკატის განცხადებით, კონკრეტულად რა მტკიცებულებების გამოკვლევას აპირებს დღევანდელ სასამართლო პროცესზე ბრალდების მხარე, ამის შესახებ ინფორმაციას დაცვის მხარე არ ფლობს.
“დღესაც ბრალდების მხარის მიერ არ გვეცნობა კონკრეტულად რა სახის მტკიცებულებების გამოკვლევას აპირებენ დღევანდელ პროცესზე. ეს არის შეთანხმების დარღვევა თუ ეს ასე მოხდა. მოსამართლის მიერ როგორც წინა, ასევე იმის წინა პროცესზე იქნა მითითება, რომ ბრალდების მხარეს და დაცვის მხარეს უნდა ჰქონდეს კომუნიკაცია და უნდა მოხდეს შეჯერება და წინასწარ უნდა ეცნობოს მხარეებს მტკიცებულებების თაობაზე, რომლის გამოკვლევასაც მხარეები აპირებენ. დღეს, ამ წუთამდე ჩვენთვის ცნობილი არ არის მოწმეების დაკითხვას აპირებენ დღეს პროცესზე თუ ისევ ვიდეომასალის გამოქვეყნებით დაკავდებიან,” – განაცხადა გიორგი კონდახიშვილმა.
შეგახსენებთ, რომ ნიკა მელიას ბრალი 2019 წლის 20-21 ივნისის ღამეს ძალადობის ორგანიზებასა და მასში მონაწილეობაში ედება.
კომენტარები