ანტისანიტარია მარტივილის კანიონის ტერიტორიაზე – რა ფოტოებს ავრცელებს მწვანეთა მოძრაობა

საქართველოს მწვანეთა მოძრაობა სოციალურ ქსელში ფოტოებს ავრცელებს და წერს:

„საქართველოს მწვანეთა მოძრაობა/დედამიწის მეგობრებს წერილობით მომართა მარტვილის რაიონის ადგილობრივი მოსახლეობის ჯგუფმა, მარტვილის კანიონის და მის მიმდებარე ტერიტორიაზე შექმნილი ანტისანიტარიული მდგომარეობის გამო.

ორგანიზაციის წევრები, არსებული მდგომარეობის შესწავლის მიზნით ა/წ 18 მაისს გაემგზავრნენ ადგილზე სადაც მათ მიერ დაფიქსირდა:

1. ადმინისტრაციულ შესასვლელთან არსებულ კაფე-ბარის ტერიტორიაზე საკანალიზაციო და გამდინარე წყლების სისტემა მოუწესრიგებელია;

2. ამავე კაფე-ბარის გვერდით, მოწყობილია მინის ტარის არალეგარული ნაგავსაყრელი;

3. მუნიციპალურ ტერიტორიაზე მდინარე აბაშაში ,,ჩაყრილი“ საყოფაცხოვრებო ნარჩენების ატივნარებული ნაწილები მოედინება კანიონში;

რაც შეეხება გარემოს ვიზუალურ ნაწილს, სამწუხაროდ:

• კანიონის ტერიტორიაზე განლაგებული სავაჭრო დახლები და ჯიხურები კუსტარული და არაესთეტიურია;

• მარტვილის კანიონის დაცული ტერიტორიის შიდა პერიმეტრზე არსებული –საცავი და წისქვილის ყოფილი შენობა, რომელიც ამჟამად გამოიყენება მხოლოდ კომერციული მიზნით, ასევე მოუწესრიგებელი და არაესთეტიურია.

გვინდა ავღნიშნოთ, რომ პანდემიიდან გამომდინარე ტურისტული ობიექტი დღეისათვის დახურულია და წერილში აღნიშნული სხვა საკითხების შემოწმება ვერ მოხერხდა.

მარტვილის კანიონი, საქართველოს ერთ-ერთი ულამაზესი ადგილია და მეტი ვიზიტორის მოზიდვის მიზნით, აუცილებელია მისი მოწესრიგება, რათა დამთვალიერებლებს საშუალება ჰქონდეს ესთეტიურ და ჯანმრთელობისათვის უსაფრთხო გარემოში დასვენება. ამისათვის კი, აუცილებელია სახელმწიფომ შეიმუშაოს კონცეპტუალური მიდგომა ადგილობრივ მოსახლეობასთან ერთად. მწვანეთა მოძრაობა/დედამიწის მეგობრები მზად ვართ, კანიონის დაცული ტერიტორიის ადმინისტრაციას ქმედითი დახმარება გავუწიოთ დაცულ ტერიტორიამდე მდინარე აბაშაში ჩაყრილი ნარჩენებისთვის ,,ნაგავდამჭერი სისტემის“ დამონტაჟებისათვის“.