გერმანიის ვაქცინაციის მუდმივი კომისიის (STIKO) ექსპერტები თვლიან, რომ დიდი ალბათობით, კორონავირუსზე ვაქცინაცია განმეორებითაც იქნება საჭირო. ამის შესახებ გამოცემა Deutsche Welle წერს.
გამოცემის ცნობით, მასობრივი ვაქცინაციის მეორე ეტაპი არაუგვიანეს 2022 წელს ჩატარდება.
STIKO-ს ხელმძღვანელის, თომას მერტენსის თქმით, პანდემია ასე მარტივად არ ჩაივლის, ამიტომ მომავალ წელს ხელახალი ვაქცინაციისთვის ყველანი მზად უნდა ვიყოთ.
გერმანიის სოციალ-დემოკრატიული პარტიის ჯანდაცვის ექსპერტის, ყოფილი ეპიდემიოლოგის, კარლ ლაუტერბახის მოსაზრებით, ვაქცინაცია იმუნურ დაცვას 6 თვის განმავლობაში უზრუნველყოფს. სწორედ ამიტომ, თუ 6 თვეში ვირუსის ცირკულაცია არ შეჩერდება განმეორებით ვაქცინაცია გახდება საჭირო.
ამასთან, ხელახალი ვაქცინაცია გახდება აუცილებელი იმ შემთხვევაშიც, თუ COVID-19-ის ახალი, ვაქცინის მიმართ მდგრადი შტამები მასშტაბურად გავრცელდება.
იტალიელი ექსპერტები აცხადებენ, რომ ქვეყანაში ვაქცინაციის დაწყების შემდეგ, ვირუსის გავრცელება 80%-ით შემცირდა. ამასთან, Pfizer-ის, Moderna-ს ან AstraZeneca-ს ვაქცინების პირველი დოზის მიღებიდან ხუთი კვირის შემდეგ ჰოსპიტალიზებულთა რაოდენობა 90%-ით დაეცა, ხოლო ვირუსით სიკვდილიანობა 95%-ით შემცირდა.
კომენტარები