„მადლობა ღმერთს, რომ გადადგა“ – გია ვოლსკი გახარიაზე

„ქართული ოცნების“ წევრმა გია ვოლსკიმ ტელეკომპანია „იმედის“ ეთერში განაცხადა, რომ კარგია გიორგი გახარიამ გადადგომის გადაწყვეტილება თვითონვე, რომ მიიღო.

„გახარიას წასვლაზე ვერ ვიტყვი, რომ რაღაც გაუგონარი მოხდა. მე უფრო მეტად დამაფიქრა იმან, რომ კრიტიკულ მომენტში, როდესაც დაანონსებული იყო სახელმწიფო ინსტიტუტების არარსებობა და ამ მიმართულებას ავითარებდა „ნაციონალური მოძრაობა, როდესაც პრემიერ-მინისტრი მოწოდების სიმაღლეზე უნდა იდგეს და დაანახვოს ყველას, რომ ქვეყანა არსებობს, სტრუქტურები არსებობს, მაშინ გადადგა და მადლობა ღმერთს რომ გადადგა.

მე არ მომწონს „ქართული ოცნების“ მონოლითურობაზე მსჯელობა გიორგი გახარიას გასვლით. საარჩევნო პროგრამით დავანახვებთ ხალხს ვინ არის მონოლითური, ვინ დაუდგა სახელმწიფოს გვერდით და ვინ მსჯელობდა სახელმწიფოებრივად. ვფიქრობ გახარიას ამ მხრივ სერიოზული მინუსი აქვს და „ქართულ ოცნებას“ გაცილებით დიდი პრივილეგია აქვს იმიტომ, რომ საზოგადოების დიდი ნაწილის ინტერესს გამოხატავს.

„ქართული ოცნების“ წევრი იყო გიორგი გახარიაც, მაგრამ ცუდად მოიქცა, არასწორად მოიქცა. კიდევ კარგი ეს თავად გადაწყვიტა და ჩამოშორდა ამ პოლიტიკურ ძალას“, – განაცხადა გია ვოლსკიმ.

ინფორმაციისთვის გიორგი გახარია პრემიერ-მინისტრის პოსტიდან 18 თებერვალს გადადგა.