ამერიკულ კომპანია Bolthouse Farms-ში დასაქმებული ყველა თანამშრომელი, ვინც COVID-ვაქცინას გაიკეთებს, კომპანიის აღმასრულებელი დირექტორისგან 500-დოლარიან პრემიას მიიღებს. ამის შესახებ თავად Bolthouse Farms-ის აღმასრულებელმა დირექტორმა ჯეფ დუნმა განაცხადა. ინფორმაციას CNBC ავრცელებს. გამოცემის ცნობით, კომპანია ამ გზით საკუთარ თანამშრომლებს ახალისებს, რომ ვაქცინა გაიკეთონ.
საგულისხმოა, რომ Bolthouse–მა 1800 დასაქმებულიდან 1000-ზე მეტი ადამიანი უკვე აცრა. კომპანიაში ვაქცინაციის პირველი ეტაპი 26 თებერვალს, 65 წლის და უფროსი თანამშრომლებისთვის ჩატარდა. კომპანიის მიზანია, თანამშრომლების 65% მაინც აიცრას და, არსებული ინფორმაციით, ისინი ამ მიზანს მალე გადააჭარბებენ კიდეც.
ცნობისთვის, Bolthouse Farms-ი საკვები პროდუქტების მწარმოებელი კომპანიაა, რომელიც არიზონაში, ვაშინგტონსა და ილინოისში ოპერირებს. კომპანია იმ პრიორიტეტულ ჯგუფებს შორის მოხვდა, რომლის თანამშრომლების აცრაც ვაქცინაციის პირველ ეტაპზე უნდა მოხდეს.
კომენტარები