„ეროვნულ-დემოკრატიული ინსტიტუტის“ (ენდიაი) კვლევის თანახმად, პანდემიასთან დაკავშირებული მოლოდინების შეფასებისას, გამოკითხულთა 33 პროცენტი ფიქრობს, რომ ყველაზე ცუდი ქვეყანამ უკან მოიტოვა, 39 პროცენტი მიიჩნევს, რომ ყველაზე ცუდი ჯერ კიდევ წინ არის და მოლოდ 6 პროცენტი ფიქრობს, რომ კორონავირუსი არ წარმოადგენს დიდ პრობლემას, 22-მა პროცენტმა უპასუხა – „არ ვიცი“.
შეკითხვაზე, კორონავირუსის საწინააღმდეგო ვაქცინა/აცრა რომ არსებობდეს, აიცრებოდით თუ არა თქვენ და თქვენი შვილები, 41 პროცენტი აცხადებს, რომ აიცრებოდა, ასევე 41 პროცენტი ამბობს, რომ არ აიცრებოდა, 17 პროცენტი აღნიშნავს, რომ „არ იცის“.
აღსანიშნავია, რომ ვაქცინასთან დაკავშირებით მცირედით შეცვლილია საზოგადოების დამოკიდებულება ივნისთან შედარებით.
კერძოდ, იმ ადამიანების რაოდენობა, ვინც ვაქცინას გაიკეთებდა, 38%-დან 41%-მდე არის გაზრდილი, ხოლო მათი რაოდენობა, ვინც არ აიცრება, 46-%-დან 41%-მდეა შემცირებული.
„ენდიაის“ მკვლევარები რამდენიმე მიგნებაზეც საუბრობენ. მათი ინფორმაციით, კაცები უფრო დიდი ალბათობით აიცრებიან, ვიდრე ქალები, მაღალი განათლების მქონე ადამიანები უფრო დიდი ალბათობით აიცრებიან, ვიდრე საშუალოზე დაბალი განათლების ადამიანები.
„ენდიაის“ ინფორმაციით, კვლევა 2020 წლის 17-24 დეკემბრის პერიოდში საქართველოს მასშტაბით, 2 053 სატელეფონო ინტერვიუს წარმომადგენლობითი შერჩევის საფუძველზე, ქვეყნის სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით). გამოკითხვის საშუალო ცდომილების ზღვარია ±1.1 პროცენტი. რესპონდენტები შემთხვევით ნომერზე დარეკვის მეთოდით შეირჩნენ.
კომენტარები