უკრაინის პრეზიდენტის ვოლოდიმირ ზელენსკის მეუღლე ოლენა ზელენსკა მსოფლიო ლიდერებს დიდი ბრიტანეთის დედოფალ ელისაბედ II-ის დაკრძალვაზე შეუერთდება. ამის შესახებ ბრიტანული გამოცემა The Sun წყაროებზე დაყრდნობით წერს.
პირველი ლედი 500 სახელმწიფოს მეთაურსა და გამორჩეულ სტუმარს შორის იქნება, რომლებიც მიწვეულნი არიან მემორიალსა და VIP მიღებაზე, რომელსაც მეფე ჩარლზი მასპინძლობს.
„ოლენა ზელენსკას ყოფნა უკრაინის გლობალური მხარდაჭერის კიდევ ერთი ნიშანია იმ დროს, როდესაც რუსეთი იზოლაციაშია. დიდი ბრიტანეთი უკრაინის ერთ-ერთი ყველაზე ერთგული მოკავშირეა. მისი დაკრძალვაზე ყოფნა ამ მეგობრობისა და ურთიერთპატივისცემის ნიშანია“, – თქვა წყარომ გამოცემასთან საუბრისას.
წყაროს თქმით, ზელენსკა უკრაინაში ცერემონიის დასრულებისთანავე დაბრუნდება.
მსოფლიო ლიდერები ლონდონში მიმდინარე შაბათ-კვირას ჩავლენ და დედოფალ ელისაბედ მეორეს ვესტმინსტერის დარბაზში პატივს მიაგებენ.
კომენტარები