ეკონომიკის სამინისტრომ 2022 წლის ელექტროენერგიი საპროგნოზო ბალანსი დაამტკიცა. მაცნეზე გამოქვეყნებული დოკუმენტის თანახმად, წელს საქართველოს მთავრობა ქვეყანაში დენის იმპორტის მნიშვნელოვან მატებას მოელის.
ანგარიშის მიხედვით, ელექტროენერგიის იმპორტი 2022 წელს 19%-ით გაიზრდება და 2.38 ტერავატ საათს მიაღწევს.
თუ გავითვალისწინებთ იმასაც, რომ გასულ წელს საქართველოში დენის იმპორტი 25%-ით გაიზარდა და 2 ტერავატ საათი იყო, გამოდის რომ საქართველო ყოველწლიურად უფრო დამოკიდებული ხდება იმპორტულ ელექტროენერგიაზე.
2022 წელს მთავრობა ქვეყანაში ელექტროენერგიის მოხმარების 5.8%-ით, 14.5 ტერავატ საათამდე მატებას პროგნოზირებს. შესაბამისად, იმპორტის წილი ადგილობრივ მოხმარებაში 16.5% უნდა იყოს (2021 წელს ის 14.6%-ს შეადგენდა).
მთავრობის მიერ გამოქვეყნებული პროგნოზი ეფუძნება დაშვებას, რომ წელს აფხაზეთის რეგიონში ელექტროენერგიის მოხმარება 2021 წლის დონეზე, ანუ 3 ტერავატ საათზე შენარჩუნდება. თუმცა, იქიდან გამომდინარე რომ რუსეთის მიერ ოკუპირებულ რეგიონში მაინინგის ბუმია, მაღალია ალბათობა რომ დენის მოხმარება წელსაც გაგრძელდეს.
შარშან აფხაზეთმა თბილისზე მეტი – 2.95 ტერავატ საათი ელექტროენერგია მოიხმარა, რაც 2020 წლის მოხმარებაზე 16%-ით მეტი იყო. რეგიონი დენით ორი წყაროდან მარაგდება, ერთია ენგურჰესის “უფასო ელექტროენერგია”, მეორე კი რუსეთის მიერ სუბსიდირებულ ფასად მიწოდებული დენი. 2021 წელს აფხაზეთმა 1 ტერავატ საათის მოცულობის ელექტროენერგია სწორედ რუსეთიდან მიიღო.
2022 წელს საქართველოში ელექტროენერგიის გენერაცია წყაროების მიხედვით ასე უნდა განაწილდეს:
● ჰიდროელექტროსადგურები – 10.6 ტერავატ საათი (მატება 3.9%);
● თბოსადგურები – 2.48 ტერავატ საათი (მატება 4.2%);
● იმპორტი – 2.38 ტერავატ საათი (მატება 19%);
● ქარის ელექტროსადგური – 85 მლნ კილოვატ საათი (მატება 2%).
● ექსპორტი – 512 მლნ კილოვატ საათი (მატება 30%);
● სულ ადგილობრივი მოხმარება – 14.5 ტერავატ საათი (მატება 5.8%).
მთავრობის პროგნოზის თანახმად, ელექტროენერგიის მოხმარების მატება წელს ძირითადად იმპორტით უნდა დაბალანსდეს.
ეკონომიკის სამინისტროს მიერ დამტკიცებულ დოკუმენტში არ არის დეტალურად ჩაშლილი თუ რომელი ქვეყნებიდან არის წელს ელექტროენერგიის იმპორტის მატება მოსალოდნელი.
2021 წლის მდგომარეობით კი იმპორტი ქვეყნების მიხედვით ასე ნაწილდებოდა:
● იმპორტი რუსეთიდან (აფხაზეთის რეგიონისთვის) – 992 მლნ კილოვატ საათი, იმპორტის 49.7%;
● იმპორტი რუსეთიდან (დანარჩენი საქართველოსთვის, რაშიც საქართველომ თანხა გადაიხადა) – 253 მლნ კილოვატ საათი, იმპორტის 12.4%;
● იმპორტი აზერბაიჯანიდან – 600 მლნ კილოვატ საათი, იმპორტის 29.9%;
● იმპორტი თურქეთიდან – 161 მლნ კილოვატ საათი, იმპორტის 8%.
2021 წელს საქართველოს დენის იმპორტი (გარდა აფხაზეთისთვის განკუთვნილი რუსული ელექტროენერგიისა) 47.6 მილიონი დოლარი დაუჯდა.
კომენტარები