„სტრატეგია აღმაშენებლის“ ლიდერი გიორგი ვაშაძე პრემიერ გახარიას და მის ფულის მკეთებელთა გუნდს ქვეყანაში შექმნილ მძიმე ეკონომიკურ მდგომარეობაზე პასუხისგებლობას აკისრებს და დანაშაულებრივ ქმედებებზე პასუხის გაცემას ითხოვს. ვაშაძე იმედოვნებს, რომ 15 ოქტომბერს, დებატებს ღია ეთერში გახარია გაქცევით არ უპასუხებს.
„რას აკეთებს ამ დროს არსებული მთავრობა და პრემიერ-მინისტრი გახარია, რომელიც თავს იკავებს ჩემთან დებატებზე, რადგან ზუსტად იცის, რომ პირადად მას მოუწევს ხალხისთვის დაგროვილ უამრავ პრობლემურ საკითხზე და დანაშაულებრივ ქმედებებზე პასუხის გაცემა. მე მინდა მივმართო მას. თქვენ აცდენილი ხართ რეალობას და არ გამოხატავთ საქართველოს მოქალაქეების დიდი უმრავლესობის ინტერესებს. რა პასუხი გაქვთ ერთი მილიონი იმ საქართველოს მოქალაქისთვის, ვინც სიღარიბეში ცხოვრობს და დღიდან დღემდე მხოლოდ იმაზე ფიქრობს როგორ მოიპოვოს საარსებო ლუკმა-პური თავისთვის და თავის ოჯახისთვის. რას ეუბნებით ათასობით პენსიონერს, რომლებიც უსამართლოდ მაღალპროცენტიან სესხს იღებენ და არ იციან ამ კაბალური პირობებით აღებული თანხით პური იყიდონ თუ წამალი. თუ გისაუბრიათ ერთ ბიზნესმენთან მაინც, რომელსაც თავისი მცირე ბიზნესის დახურვა მოუწია არსებული კრიზისის გამო? რა პასუხი გაქვთ იმ დედებისთვის, რომლებმაც სამსახური დაკარგეს ამ ბიზნესების დახურვის გამო და ფული არ აქვთ თავისი შვილის საჭმლისა და წამლისთვის? 8 წლის თავზე, ისევ მხოლოდ დაპირებები გემეტებათ მათთვის? ჩემ გუნდთან ერთად ბოლო წლების განმავლობაში მოვიარე მთელი საქართველო, შევხვდი უამრავ ადამიანს, ვიცი მათი სატკივარი და მათი პრობლემების გადაჭრის გზები და რას ეუბნებით მათ, რომ არ გეყოთ რვა წელი, მათი ძარცვისთვის, მათი ასეთ მძიმე ყოფაში ჩაგდებისთვის და კიდევ მესამე ვადით, 4 წლით ითხოვთ არჩევას, იმისთვის, რომ კიდევ 4 წელი ძარცვოთ ხალხი და კიდევ უფრო გაართულოთ მათი და ჩვენი ცხოვრება. სად არის 5 მილიარდი, რომელიც საერთაშორისო თანამეგობრობამ ქვეყნის მოსახლეობის დასახმარებლად გასცა? თქვენ რა თქმა უნდა, ამაზე პასუხის გაცემა არ გსურთ, მაგრამ მინდა იცოდნენ ჩვენმა მოქალაქეებმა, რომ პარლამენტში ქართული ოცნების უმრავლესობიდან 37 წევრი და მათი 6 მინისტრი ხალხის და ამ დახმარებების ხარჯზე გამდიდრებული მილიონერია. საქართველო ვერ გახდება ივანიშვილისა და მისი მთავრობის გამდიდრების ბიზნეს-მოდელი. სწორედ ამიტომ, 15 ოქტომბერს, ჩვენ ორს გვექნება დებატები ღია ეთერში და იმედი მაქვს არ გაექცევით ამ გამოწვევას,“ – განაცხადა გიორგი ვაშაძემ.
კომენტარები