ტელეკომპანია „ჯორჯიან თაიმსის“ ტელეწამყვანის, მაკა რაზმაძის მიერ „ფეისბუკის” პირად გვერდზე გამოქვეყნებული პოსტის საფუძველზე, სპეციალურმა საგამოძიებო სამსახურმა გამოძიება დაიწყო.
“სპეციალურმა საგამოძიებო სამსახურმა ჟურნალისტ მაკა რაზმაძის მიერ სოციალურ ქსელში გაზიარებული ინფორმაციის საფუძველზე, ჟურნალისტის პროფესიულ საქმიანობაში უკანონოდ ხელის შეშლის ფაქტზე საქართველოს სისხლის სამართლის კოდექსის 154- ე მუხლის პირველი ნაწილით გამოძიება 2022 წლის 23 მაისს დაიწყო.
სპეციალური საგამოძიებო სამსახური შემჭიდროვებულ ვადებში ჩაატარებს ყველა საჭირო საგამოძიებო და საპროცესო მოქმედებას.
ჟურნალისტების უფლებების და მათი პროფესიული საქმიანობის დაცვა სპეციალური საგამოძიებო სამსახურის ერთ-ერთი მთავარი პრიორიტეტია”, – ნათქვამია სპეციალური საგამოძიებო სამსახურის განცხადებაში.
ცნობისთვის, მაკა რაზმაძე სოციალურ ქსელში წერს, რომ პოეტ ზვიად რატიანისგან მიიღო სიძულვილის, შანტაჟის და მუქარის შემცველი გზავნილები.
ჟურნალისტი უკვე იმყოფებოდა გამოკითხვაზე.
კომენტარები