“ზელენსკის და რადას სააკაშვილის ექსტრადირების ტექსტი მომზადებული აქვთ” – რადას დეპუტატი

უკრაინის ხელისუფლებას უკვე მომზადებული აქვს ტექსტი, რომელიც საქართველოს მთავრობას უნდა გაუგზავნოს. ამის შესახებ ინფორმაციას რადას უმრავლესობის დეპუტატი ალექსანდრე კოვალჩუკი ადგილობრივ მედიაში ავრცელებს.

“უკრაინის საგარეო უწყებას, პრეზიდენტ ზელენსკის და პარლამენტის უმრავლესობას უკვე აქვთ შემუშავებული ტექსტი, რომელიც საქართველოს ხელისუფლებას უნდა გაეგზავნოს” – აცხადებს რადას დეპუტატი.მისი თქმით, სააკაშვილის ჯანმრთელობის მდგომარეობა სავალალოა და ის რაც შეიძლება სწრაფად უნდა დაბრუნდეს უკრაინაში.

“ჩვენ ვნახეთ რა დღეშია სააკაშვილი. მას არ აძლევენ ტელეფონის სარგებლობის უფლებას და არ გადაჰყავთ შესაბამის კლინიკაში, რომელიც ახლა მას ძალიან სჭირდება” – აცხადებს კოვალჩუკი.

შეგახსენებთ, საქართველოს მესამე პრეზიდენტი, მიმდინარე წლის 1 ოქტომბრიდან საქართველოში, კერძოდ რუსთავის ციხეში იმყოფება და შიმშილობს. მისი უკრაინაში შესაძლო ექსტრადირებასთან დაკავშირებით, რამდენიმე დღის წინ, უკვე განცხადება გაავრცელა “ქართული ოცნების” ერთ-ერთმა ლიდერმა ირაკლი კობახიძემ. მისი თქმით, ექსტრადირების საკითხი არ განიხილება.