რუსული ჯარის უკრაინაში შეჭრის შემდეგ დაფიქსირებული პოზიციის გამო ტელეკომპანია ТНТ-ს გენერალური დირექტორის მოვალეობის შემსრულებელმა, თინა კანდელაკმა, რომელსაც უამრავი ადამიანის რისხვა დაატყდა თავს, “ინსტაგრამის” პირად გვერდზე მორიგი სტატუსი გამოაქვეყნა.
“არც მე, არც ჩემ გარშემო მყოფი ადამიანები, არავინ, მათ შორის, ვისაც მეგობარს ან ახლობელს ვუწოდებ, არც ჩემი თანამშრომლები არ მიიჩნევენ, რომ ადამიანთა გარდაცვალება ნორმალურია.
მე გავავრცელე ასეთი მიმართვა:
ვთვლი, რომ ეს ყველას ესმის: ნებისმიერ კონფლიქტსა და დაპირისპირებაში ინფორმაციულ ომს თავისი ადგილი აქვს.
ახლა მე თვალს ვადევნებ, თუ რამდენი წყევლა იღვრება სოციალური ქსელებიდან. მე არ ვგულისხმობ ჩემი მისამართით ნათქვამ სიტყვებს, თუმცა, თუკი თქვენ ჩემს წინა სტატუსს გადაიკითხავთ, დაინახავთ, რომ ეს იყო გაფრთხილება ყალბი, ურთიერთსაწინააღმდეგო ინფორმაციის გავრცელების შესახებ და მითითება იმ ადამიანებისთვის, ვისთვისაც უკრაინელების ერთი ნაწილი რატომღაც უფრო ძვირფასი აღმოჩნდა, ვიდრე – მეორე. წერტილი.
დიახ, ამ ომში მე არ ვაკეთებ არჩევანს რუსული ჯარის წინააღმდეგ, თუმცა, ეს არ ნიშნავს, რომ მე არ მსურს კონფლიქტის მშვიდობიანად დასრულება.
მრავალი წლის განმავლობაში ვმუშაობდი კიევში და მე ვიყავი უკანასკნელი ადამიანი, ვინც ისურვებდა, უკრაინული მხარის შესახებ ყველა ინფორმაცია ეჭვქვეშ დაეყენებინა.
აგრესია, რაც გუშინ მე და ჩემს ოჯახს დაგვატყდა, გასაგები, თუმცა, უკიდეგანოა.
ვწუხვარ, თუკი ჩემი ნათქვამით ვინმეს ვაწყენინე და შეურაცხყოფა მივაყენე.
მაგრამ რატომ ფიქრობთ, რომ თუკი ადამიანს საკუთარი აზრის გამოხატვის გამო ჯვარს აცვამთ, ამით მშვიდობისკენ ნაბიჯს გადადგამთ? არა, ასე არ ხდება. ეს მორიგი ბიძგია ომისკენ”, – აღნიშნა კანდელაკმა.
კომენტარები