“ჩვენი არც ერთის ადგილი არ არის იქ, სადაც ვდგავართ, მაგრამ რა უნდა გავაკეთოთ, რომ საკუთარი სიცოცხლეები და ჩვენი ჟურნალისტებისა თუ ოპერატორის სიცოცხლეები დავიცვათ. ვინაა ჩვენი შემწე?” – ამის შესახებ “მთავარი არხის” გენერალურმა დირექტორმა, ნიკა გვარამიამ “ღამის მთავარში” საუბრისას განაცხადა.
როგორც გვარამიამ გადაცემაში აღნიშნა, ტელევიზიაზე ყველა მხრიდან მიმდინარეობს შეტევა, ემუქრებიან ჟურნალისტებს, რაც – “ქართული ოცნების” სამარცხვინო სახეა”.
“ესენი [ჟურნალისტები] პატარა ბავშვები არიან თავის უმრავლესობაში, ჩემზე უფრო გამბედავები არიან, მაგრამ თვითცენზურა, რომელიც ყალიბდება და ამას თავადაც არ აღიარებენ, მაგრამ სადღაც შიში ხომ კრისტალდება, ყოველ წუთში ჩასძახის ქვეცნობიერად, რომ ახლა ეს კითხვა არ დასვა, ამას არ გაეკარო, ცენზურა არ არის ასეთი მნიშვნელოვანი, პირიქით ის უკურეაქციას წარმოშობს, მაგრამ თვითცენზურა არის ურჩხული, რომელიც ანგრევს მედიას და ნებისმიერ ადამიანს, რომლისთვისაც საქმიანობა არის აზრის გამოხატვა.
ჩვენი არც ერთის ადგილი არ არის იქ, სადაც ვდგავართ, მაგრამ რა უნდა გავაკეთოთ, რომ საკუთარი სიცოცხლეები და ჩვენი ჟურნალისტებისა თუ ოპერატორის სიცოცხლეები დავიცვათ. ვინაა ჩვენი შემწე? მთავრობა შემწე კი არაა პირიქით, რა ვქნათ ამ მთავრობის წასვლა არ მოვითხოვოთ იმიტომ, რომ გადავრჩეთ?
დამნაშავეების დასჯა არ მოვითხოვოთ იმიტომ, რომ გადავრჩეთ? იუსტიციის მინისტრზე საქმის აღძვრა არ მოვითხოვოთ, იმიტომ, რომ პირდაპირ ეთერში მიკროფონი მოგვპარა? ეს კომიკური იქნებოდა დიდი ტრაგედია, რომ არ იყოს. მთავარია, რომ ეს არის წინასაარჩევნო კამპანია და არჩევნების გაყალბება, რომელიც დღესვე მიმდინარეობს. ოპოზიციური მედიის ჩახშობა, რომელიც უკვე მთელი თვეა მიმდინარეობს, არის ოპოზიციის ხმის ჩახშობა, “ოცნებისთვის” კომფორტის ზონის შექმნა. აირჩიეს ახალი მტრის ხატი, ესაა მედია, როგორ ეზიზღება ყველას ამას ეკლესიაც უწყობს ხელს ზუსტად იმავეს მოითხოვს”, – განაცხადა ნიკა გვარამიამ.
ინფორმაციისთვის, ბოლო რამდენიმე დღის განმავლობაში კრიტიკულ მედიაში მომუშავე ჟურნალისტებითვის პროფესიულ საქმიანობაში ხელის შეშლის რამდენიმე ფაქტი მოხდა. ერთ-ერთი ასეთი ინციდენტი “ფორმულას” ჟურნალისტს 27 ივლისს შეემთხვა, რომელიც სხვა მედიის წარმომადგენლებთან ერთად სახელმწიფო უსაფრთხოების სამსახურის შენობასთან მუშაობდა და რა დროსაც მას ახალგაზრდა მამაკაცმა სიტყვიერი შეურაცხყოფა მიაყენა. მანამდე კი “მთავარი არხის” ჟურნალისტსა და “ნაციონალური მოძრაობის” წევრს, გიორგი კაპანაძეს ინტერვიუს ჩაწერის დროს მოქალაქემ საცხოვრებელი კორპუსიდან წყალი გადამოასხა. იქვე მყოფმა პირმა რეპორტიორს უთხრა, რომ მისი საქციელით, – “ალბათ იმსახურებდა, ასე მომხდარიყო”.
კომენტარები