,, ვერანაირად გავაგებინე, რომ ჩემი შვილები საქართველოში დაბრუნდნენ უცხოეთში განათლების მიღების შემდეგ” – რას წერს მამუკა ხაზარაძე

,,ლელოს” დამფუძნებელი, მამუკა ხაზარაძე სოციალურ ქსელში წერს:

,,შოტლანდიაში კლასიკური მანქანების ტრადიციული რბოლა გაიმართა, სადაც 200-ზე მეტი ავტომოყვარული მონაწილეობდა.

საღამოს ვახშამზე, გვერდით ერთი ძალიან წარმატებული, ჰოლანდიელი მსხვილი ბიზნესმენი მეჯდა, რომელიც, უკვე მერამდენედ, გაკვირვებით მეკითხებოდა, რატომ წავედი პოლიტიკაში, რატომ ავიტკიე თავი და რატომ არ ვუთმობ დროს ისეთ რაღაცებს, რასაც თვითონ აკეთებს – მოგზაურობას, დასვენებას, გართობას… ამბობდა, რომ პოლიტიკა უმადური საქმეა, საშიშია, რომ ბევრ ტალახს მესვრიან (რა იცის უკვე რამდენი მესროლეს), რომ სასწორზე ვდებ ყველაფერს, რაც აქამდე შემიქმნია (არ მითქვამს, რომ დიდი ხანია სასწორზეა), რომ არავინ მადლობას არ მეტყვის…

მოკლედ, ვერანაირად გავაგებინე, რომ ჩემი შვილები საქართველოში დაბრუნდნენ უცხოეთში განათლების მიღების შემდეგ, რომ საქართველოში უნდა შექმნან თავიანთი მომავალი, რომ ქვეყანას აქვს დიდი პერსპექტივა, გახდეს წარმატებული და განვითარებული… ვუთხარი, რომ მკაფიოდ ვხედავ, როგორი მაგარი ქვეყანა შემიძლია ავაშენო ჩემს თანაგუნდელებთან ერთად. ვერ დავარწმუნე. მივხვდი, რომ არ დამიჯერა. ალბათ ასე არ სჯერა ბევრს საქართველოშიც, ასე არ სჯეროდათ 90-იან წლებში, როცა ვამბობდი, რომ დიდ და საერთაშორისო მნიშვნელობის კომპანიებს შევქმნიდი, მაშინ როცა არანაირი საწყისი კაპიტალი ამისთვის არ გაგვაჩნდა, რომ კონკურენციას უცხოურ კომპანიებს გავუწევდით და მსოფლიო ბაზარზე გავიდოდით… რომ შევქმნიდით მაგარ პროფესიონალთა გუნდს ბიზნესის სხვადასხვა სფეროში, რომ ბევრჯერ გვაღიარებდნენ მსოფლიოში, რომ 13 ათასი ადამიანი იმუშავებდა მუდმივად და ოთხი ან ხუთი ამდენი იმუშავებდა ამ წლების განმავლობაში ჩვენს შექმნილ კომპანიებში.

დავფიქრდი და აღმოვაჩინე, რა არის ბედნიერება, (ცოტა სასაცილოდ ან უცნაურად ჟღერს არა?) თუმცა დავწერ მაინც – ბედნიერება, ჩემი აზრით, მიზნის ქონა და ამისათვის დახარჯვაა, განსაკუთრებით მაშინ, თუ ეს მიზანი შენს ქვეყანასთან, მის ხალხთან, მომავალთან და განვითარებასთანაა კავშირში. კი, ასეა ზუსტად, ამ მიზნისთვის დახარჯვა და თავდადება არის ის, რაც განიჭებს უდიდესი ბედნიერების განცდას, გაძლევს ძალას და აგავსებს ახალი ენერგიით. ალბათ ამას მოხუცებულობაში უფრო მიხვდება ადამიანი, უკან როცა მოიხედავს…

მიზნის ქონასა და ბედნიერებას გისურვებთ!”