პირველად ბოლო სამი წლის განმავლობაში, ვენესუელის წამყვანი ოპოზიციური პარტიები ადგილობრივი თვითმმართველობის არჩევნებში მონაწილეობას მიიღებენ. ოპოზიციური პარტიების ალიანსმა “დემოკრატიული ერთობის მრგვალი მაგიდა” განაცხადა, რომ ბოიკოტს წყვეტს. ინფორმაციას Deutsche Welle ავრცელებს.
ამასთან, ალიანსში აცხადებენ, რომ გამჭვირვალე არჩევნებს არც ახლა ელიან.
”თუმცა არჩევნები არის შესაფერისი საბაბი, რათა მოქალაქეების პოზიციები გავაძლიეროთ და ვენესუელის ხელისუფლებას ქვეყანაში მძიმე კრიზისის რეალური გადაწყვეტისკენ – თავისუფალი საპრეზიდენტო და საპარლამენტო არჩევნებისკენ ვუბიძგოთ”, – აღნიშნულია ალიანსის განცხადებაში.
მსოფლიოს 50-ზე მეტმა ქვეყანამ ხუან გუაიდო ვენესუელის გარდამავალ პრეზიდენტად ცნო. ვენესუელაში, ბრძოლა ძალაუფლებისთვის მადუროს მემარცხენე-ცენტრისტ მთავრობას, რომელსაც მხარს რუსეთი, ჩინეთი, თურქეთი, სირია და კუბა უჭერს, და ხუან გუაიდოს მემარჯვენე-ცენტრისტ ოპოზიციას შორის უკვე რამდენიმე წელია მიმდინარეობს. 2018 წლის საპრეზიდენტო არჩევნების შემდეგ ხუან გუაიდომ განაცხადა, რომ შედეგები გაყალბებული იყო და 2019 წლის იანვარში თავი პრეზიდენტის მოვალეობის შემსრულებლად გამოაცხადა. მიუხედავად ამისა, მან მადუროს ხელისუფლებიდან ჩამოშორება დღემდე ვერ მოახერხა.
კომენტარები