გერმანიის ეკონომიკის მინისტრმა და ვიცე-კანცლერმა რობერტ ჰაბეკმა უარყო ინფორმაცია უკრაინისთვის მეტი მხარდაჭერის შესახებ მისი ქვეყნის უსაფრთხოების მოტივით. ამის შესახებ მან Rheinische Post-თან ინტერვიუში განაცხადა.
„ყველაფერში, რასაც ვაკეთებთ, ძალიან ფრთხილად ვართ, რომ არ გადავდგათ ნაჩქარევი ნაბიჯები, რამაც შეიძლება გერმანია რუსეთის სამიზნედ აქციოს“, – განაცხადა ჰაბეკმა.
მისი თქმით, უკრაინას ამის გაგება უჭირს.
„პოლიტიკაში არ არსებობს მორალურად უნაკლო პოზიცია. მაგრამ ყოველთვის არის მსჯელობა უფრო დიდი ბოროტების თავიდან აცილებაზე. ყველა პოლიტიკური ნაბიჯი აქედან გამომდინარეობს“, – დასძინა მან.
გერმანიის საგარეო საქმეთა მინისტრმა ანნალენა ბურბოკმა განაცხადა, რომ უკრაინაში ომის დასრულებაზე პასუხისმგებლობა რუსეთის პრეზიდენტ ვლადიმირ პუტინს ეკისრება და მხოლოდ მას შეუძლია ამ ომის შეჩერება.
შეგახსენებთ, რომ უკრაინაზე რუსეთის თავდასხმის შემდეგ, გერმანიის ფინანსთა მინისტრმა კრისტიან ლინდნერმა უკრაინის ელჩს ბერლინში განუცხადა, რომ უკრაინას „მხოლოდ რამდენიმე საათი დარჩა“ და შესაბამისად, ეწინააღმდეგებოდა კიევისთვის იარაღის მიწოდებას და რუსეთის SWIFT-დან გათიშვას.
კომენტარები