აგვისტოს ომის მონაწილე ცხინვალის იზოლატორშია გადაყვანილი – საოკუპაციო ხაზიდან გატაცებულ ლევან მაჩებელს რუსზე სამხედროებზე თავდასხმის მოწყობის მცდელობაში ადანაშაულებენ. აგვისტოს ომის მონაწილე საოკუპაციო ხაზთან დათა პაპას ოჯახის დასახმარებლად ჩავიდა რა დროსაც ოკუპანტებმა მძევლად აიყვანეს.
დე ფაქტო უშიშროების კომიტეტი ამტკიცებს, რომ საქართველოს მოქალაქე უკრაინის სოლიდარობის გამო რუს ჯარისკაცებზე იერიშის მიტანას აპირებდა.
საოკუპაციო რეჟიმმა ვიდეო ჩანაწერიც გაავრცელა. უცნობია, რა პირობებში მოხდა მისი ჩაწერა.
ოკუპირებული ცხინვალის რეგიონის ე.წ უშიშროების კომიტეტი სპეციალურ განცხადებაში წერს, რომ ყოფილი ჯარსიკაცი სოფელ ქერეს მიმდებარე ტერიტორიაზე, ოკუპირებულ სოფელ გოიათასთან დააკავეს.
მარიონეტული რეჟიმის განცხადებით, მაჩაბელი 2005 წლიდან 2009 წლამდე საქართველოს შეიარაღებული ძალების მე-3 ბრიგადის სამხედრო მოსამსახურე და აქტიურ მონაწილეობას იღებდა 2008 წლის აგვისტოს საომარ მოქმედებებში.
დე ფაქტო უშიშროების კომიტეტის მტკიცებით, “ლევან მაჩაბელს სურვილი ჰქონდა უკრაინაში რუსეთის წინააღმდეგ საბრძოლველად წასულიყო, თუმცა მას ჯანმრთელობის მდგომარეობის გამო უარი უთხრეს და ამის შემდეგ მან გადაწყვიტა ზიანი მიეყენებინა ცხინვალში მყოფი რუსი ჯარისკაცებისთვის”.
მომხდარის შესახებ საქართველოს სახელმწიფო უსაფრთხოების სამსახურმა სპეციალური განცხადება გაავრცელა. სუს-ის ცნობით, სახელმწიფო უსაფრთხოების სამსახურმა გაააქტიურა ევროკავშირის სადამკვირვებლო მისიის მეშვეობით მოქმედი „ცხელი ხაზი“. მომხდარის შესახებ ინფორმაცია დაუყოვნებლივ მიეწოდა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს.
“გვინდა აღვნიშნოთ, რომ გავრცელებული ინფორმაცია, თითქოს უკანონოდ დაკავებული პირი მოქმედი სამხედროა, სიმართლეს არ შეესაბამება.
საქართველოს ცენტრალური ხელისუფლების მიერ ამოქმედებულია მის ხელთ არსებული ყველა მექანიზმი უკანონოდ დაკავებული პირების უმოკლეს ვადებში გასათავისუფლებლად.
უკანონო დაკავებების მავნე პრაქტიკა ზღუდავს თავისუფალი გადაადგილების ფუნდამენტურ უფლებას, მნიშვნელოვნად აუარესებს ადგილზე არსებულ უსაფრთხოების გარემოს და საფრთხეს უქმნის რეგიონში არსებულ მდგომარეობას”, – წერია განცხადებაში.
კომენტარები