ტრამპის წარმომადგენელმა “ამერიკის ხმის” თითქმის მთელი რედაქცია სამსახურიდან დაითხოვა

ამერიკის შეერთებული შტატების გლობალური მედიის სააგენტოს აღმასრულებელი დირექტორის მოვალეობის შემსრულებლის მთავარმა მრჩეველმა, კერი ლეიკმა სამსახურიდან “ამერიკის ხმის” დარჩენილი თანამშრომლების უმეტესობა დაითხოვა.

კერი ლეიკმა 20 ივნისს განცხადება გაავრცელა, სადაც წერია, რომ სააგენტოში, რომლის ნაწილიც “ამერიკის ხმაა”, სამუშაო ადგილების 85% – ანუ ჯამში 1 400 პოზიცია გაუქმდა.

აშშ-ის პრეზიდენტის, დონალდ ტრამპის წარმომადგენელი აღნიშნავს, რომ “ამერიკის ხმაში” მუშაობას თანამშრომელთა “კანონით გათვალისწინებული მინიმალური ოდენობა” აგრძელებს. ლეიკი ზუსტ რაოდენობას არ ასახელებს, თუმცა წერს, რომ USAGM-ში 250 სამუშაო ადგილი დარჩება.

შეგახსენებთ, 14 მარტს დონალდ ტრამპმა განკარგულება გამოსცა, რომლის თანახმადაც უნდა შემცირდეს შვიდი ფედერალური სააგენტო, მათ შორის USAGM, რომელიც ზედამხედველობას უწევს ამერიკის ხმას, სხვა ფედერალურ მაუწყებლებსა და რადიო თავისუფალი ევროპა/რადიო თავისუფლებას.