,, თვალს ვადევნებ, როგორ დაიყო კუტოკებად პროტესტი და რა ანტაგონიზმი დაიწყო ამ კუტოკებს შორის” – ნინო ჯანგირაშვილი

ჟურნალისტი, ,,კავკასიის” დირექტორი ნინო ჯანგირაშვილი:

,,ქართული ოცნება ობიექტურად არის უმძიმეს დღეში. არაღიარება მისთვის გამანადგურებელია. უკვე იმ ზღვრამდე მიდის სიტუაცია, რომ მალე უდიდეს დარტყმებს მიიღებს ქვეყნის ეკონომიკა და ზუსტად ისე მოექცევიან საქართველოს დასავლეთიდან, როგორც რუსეთს. მათ შორის სანქციების საკითხში, რასაც აქამდე არ აკეთებდნენ, მაინც პარტნიორობას უფრთხილდებოდნენ და პატიობდნენ ბევრ რამეს. ამ ტრაექტორიის გაგრძელების შემთხვევაში ქვეყანას წლის ბოლომდე სრული კოლაფსი ელის. ეს ოცნებამაც მშვენივრად იცის. რუსეთი ვერაფერს უშველის და არც უშველის. რუსეთი ისე მოექცევა კობახიძე–ივანიშვილს, როგორც ვასალებს ექცევახოლმე, ანუ სახეს აახევს ბოლომდე. და აკეთებს კიდევაც. ამ გზით და ამ ფორმით ძალაუფლებას უბრალოდ ვერ შეინარჩუნებს ივანიშვილი, სულ რომ ციხეში გამოკეტოს ნახევარი საქართველო. შეუძლებელია ივანიშვილი ამას არ აცნობიერებდეს. ყველაზე კარგად მან იცის რა ცუდად არის საქმე. ოცნება ოცნებობს, რომ ვინმე მაინც დაელაპარაკოს და არაპირდაპირი ნიშნები მაინც მიიღოს აღიარების. თუ სადმე ხმა მიუწვდებათ ამტკიცებენ, პროტესტი ჩაქრა, პრობლემა აღარ არის და დაგველაპარაკეთო. ანუ, მთავარი პრობლემა ამათთვის არის პროტესტი. სანამ არის პროტესტი, არავინ ამათ არ აღიარებს. და რა ხდება ამ დროს აქეთ? ვარ ჩუმად და თვალს ვადევნებ, როგორ დაიყო კუტოკებად პროტესტი და რა ანტაგონიზმი დაიწყო ამ კუტოკებს შორის. 26 მაისისთვის, როცა წესით ერთიანობის და პროტესტის უწყვეტობის დემონსტრირება უნდა მოვახდინოთ, უკვე რამდენიმე სხვადასხვა აქცია შემომხვდა სხვადასხვა დროს და სხვადასხვა ადგილზე დაანონსებული. ვიღაცეები წერენ საერთოდ არ წავალო. შეგნებულად არ ვაკონკრეტებ არავის, იმიტომ რომ ჩემთვის და ჩემნაირებისთვის საერთოდ არ აქვს მნიშვნელობა სახელს და გვარს, ვინ არის ის, ვინც დანარჩენებს არ ელაპარაკება, რა არის მიზეზი, ვინ არის მტყუანი და ვინ მართალი. არ მაინტერესებს. ყველა იქნებით კობახიძეზე უარესები, ვინც 26 მაისს ცალკე დააანონსებთ, ისე, რომ სხვა ჯგუფებთან არ იქნებით კოორდინირებული და შეთანხმებული. როგორც გინდათ ისე დაელაპარაკეთ და მოელაპარაკეთ ერთმანეთს. აიღეთ ტელეფონი და დაურეკეთ, მიწერეთ, შეიკრიბეთ, ან ისე შეთანხმდით. თუ ბოდიშია მოსახდელი, მოუხადეთ ბოდიში და დადეთ ერთი სცენარი 26 მაისისთვის. ნებისმიერი კუტოკი, ვინც მეორე კუტოკს კბენს ამ მომენტში ჩემთვის გულის ამრევია. დაგავიწყდათ რა დევს სასწორზე?“