თურქეთში მაისის შემდეგ კოვიდინფიცირების რეკორდი დაფიქსირდა

13 სექტემბერს თურქეთში COVID-19-ის 27 802 ახალი შემთხვევა დადასტურდა, რაც 4 მაისის შემდეგ რეკორდული მაჩვენებელია. ინფორმაციას The Guardian ავრცელებს.

რეკორდული აღმოჩნდა კორონავირუსით დღიური გარდაცვალების მაჩვენებელიც. ერთ დღე-ღამეში ვირუსს 276 ადამიანი ემსხვერპლა.

The Guardian წერს, რომ ივლისის შუა რიცხვებიდან გარდაცვალების რიცხვი მკვეთრად გაიზარდა, მას შემდეგ რაც კორონავირუსთან ბრძოლის მიზნით დაწესებული ბევრი შეზღუდვა გაუქმდა.

Worldometers-ის მონაცემებით, პანდემიის დაწყებიდან დღემდე თურქეთში კორონავირუსის 6 710 666 შემთხვევა დადასტურდა, 60 393 ადამიანი გარდაიცვალა, 6 201 905 გამოჯანმრთელდა. ქვეყანაში მოსახლეობის თითქმის 50 პროცენტი ვაქცინირებულია.