უკრაინაში მიმდინარე მოვლენებს ეხმაურება სოციალურ ქსელში თბილისის საკრებულოს ყოფილი დეპუტატი, „ნაციონალური მოძრაობის“ წევრი სევდია უგრეხელიძე. ის ამბობს, რომ უკრაინაში განვითარებულ მოვლენებს არც თუ ოპტიმისტურად უყურებს, თუმცა სჯერა, რომ უკრაინა გადარჩება.
უგრეხელიძე ოპტიმიზმს ქართული საზოგადოების მიმართაც გამოხატავს და წერს, რომ ქვეყნის „ფსკერიდან ამოყვინთვის“ იმედი აქვს.
„არ ვარ ოპტიმისტი. არ მჯერა, რომ რუსეთი უკან დაიხევს ან უკრაინა საკმარის მხარდაჭერას მიიღებს. მაგრამ მგონია, იომებენ და საბოლოო შედეგს თვითონ მიაღწევენ-გადარჩებიან.
არ მჯერა, რომ ქართველების დიდი უმრავლესობა პატიოსანი, ჭკვიანი და პატრიოტია, მაგრამ იმ თავმოყვარე, გამრჯე, ნიჭიერი ხალხის იმედი მაქვს, მხოლოდ საქართველოში რომ აპირებს ცხოვრებას. არ მგონია, რომ ყოველთვის სწორად ვიქცევი, მაგრამ უმოქმედობას ვერ ვეგუები და ამიტომ ბევრს ოპტიმისტი ვგონივარ. მეც ვცდილობ დავიჯერო, რომ საქართველო არაა მანქურთების ქვეყანა, ამოვყვინთავთ ამ ფსკერიდან და სხვა ნორმალური ერების მსგავსად ვიცხოვრებთ. თუ ვერ მოვესწრები-მომწერეთ,“- წერს სევდია უგრეხელიძე.
კომენტარები