“თავისუფლების ხმა ციხიდან” – სინდისის პატიმრების ოჯახის წევრები გაზეთებს დღეს ქუთაისში არიგებენ

სინდისის პატიმრების ოჯახის წევრები იმერეთში  შეხვედრებს განაგრძობენ. სიმართლის გამავრცელებელი გაზეთები დღეს ქუთაისში რიგდება.

პატიმრების მშობლები მიიჩნევენ, რომ მნიშვნელოვანია, მოქალაქეებმა სიმართლე იცოდნენ. მათი თქმით, საზოგადოებას უნდა ჰქონდეს ინფორმაცია იმ აბსურდულ ბრალდებებზე, რომლითაც “ოცნების” ხელისუფლებამ ევროპული კურსის მხარდასაჭერ აქციებზე დაკავებულთა ნაწილი გაასამართლა ან უახლოეს პერიოდში გამოუტანს განაჩენს.

სინდისის პატიმრის, თორნიკე გოშაძის დედა ამბობს, რომ ქუთაისის მოსახლეობა მათ გულთბილად დახვდა.

“მადლობა ქუთაისს, რომ დაგვხვდა ძალიან თბილად და არც იყო გასაკვირი, იმიტომ, რომ ჩვენ ჩამოვედით დიდი ქალაქიდან მეორე დიდ ქალაქში და ამ ქალაქის იმედი სულ გვაქვს. ყოველთვის გვიხაროდა, როცა გავიგებდით, რომ აი, ქუთაისში აქცია იმართება, ბათუმში აქცია იმართება. ყველაზე დიდი ძალა ხართ მაშინ ჩვენთვის იმიტომ, რომ ჩვენ 9 თვეა უკვე დაუღალავად ვიბრძვით ჩვენს შვილებთან ერთად”, – ამბობს თორნიკე გოშაძის დედა მარიზი კობახიძე.