ანი დვალიშვილი
ვაკის პარკში მომხდარმა ტრაგედიამ მმართველი გუნდი საგრძნობლად შეაჯანჯღარა, უკვე მერამდენედ, კალაძეს წამოაძახეს, რომ ტენდერებს დედაქალაქში უთავრესად ის კომპანიები იგებენ, რომელთა სათავეშიც ყოფილი ნაციონალები დგანან, ის ხალხი, ვინც ადრე, არჩევნების დროს, ნაციონალების მთავარი ფინანსური საყრდენი იყო.
„რეალურად, ეს პრობლემა დღემდე მწვავედ დგას არამარტო დედაქალაქში, არამედ რეგიონებშიც. ტენდერების აბსოლუტურ უმრავლესობას სწორედ ყოფილი ნაციონალები იგებენ, ისინი, ვინც კონკრეტული კომპანიების უკან იდგა და არ ჩანდა, ახლა კი გამოჩდნენ. როგორც კალაძე, ისე სხვები ხელებს იბანენ და ამბობენ, რომ ეს ყველაფერი ახალი კანონის მიღების შემდეგ ხდება და ისინი დამნაშავეები არ არიან. რას გულისხმობს ახალი კანონი? 2014 წელს, როცა „ოცნებამ“ როგორც იქნა, დაიჯერა, რომ ხელისუფლებაში იყო, გამოჩნდა ვიღაც ჭკვიანი, რომელმაც ასი პროცენტით ნაციონალების დავალება შეასრულა და თქვა, რომ საჭირო იყო კანონი, რომლის მიხედვითაც, ტენდერებში მონაწილეობას ვერ მიიღებდა კომპანია, თუ არ ჰქონდა, ყველაზე ცოტა, 3-წლიანი გამოცდილება. ამით თითქოს თავს იზღვევდნენ აგორებული კამპანიისგან, რომ „ოცნება“ ტენდერებს საკუთარ მომხრეებს აძლევდა, სინამდვილეში კი ყველაფერი დაგეგმილი იყო და ამ კანონის დაჩაქუჩებით, „ოცნებამ“ ახალ კომპანიებს ბაზარზე შესვლის შესაძლებლობა მოუსპო, რადგან მათ ელემენტარულად ვერ ექნებოდათ 3-წლიანი გამოცდილება. ამიტომაც, ტენდერების 90%-ზე მეტს სწორედ ყოფილი ნაციონალები იგებდნენ. მერე კი შევიდა შესწორება, რომ 3-წლიანი გამოცდილება მხოლოდ დიდ თანხებზე იყო საჭირო, მაგრამ ამით ბევრი არაფერი შეცვლილა. „ოცნების“ აქტივი იგებდა და იგებს რამდენიმე ათასიან ტენდერს, ყოფილი თუ მოქმედი ნაციონალები – მილიონიანებს“, – გვეუბნება „ოცნების“ მაღალჩინოსანი.
სხვათა შორის, ამ თემაზე ადრეც ბევრი გაწევ-გამოწევა იყო პარტიულ ოფისში. „ოცნების“ ლიდერებს არ სურდათ იმის აღირება, რომ მოტყუვდნენ და თანაც, ნაცებთან ურთიერთობები დაალაგეს. ასე, მაგალითად, კონკრეტული კომპანია წილის სახით, შინაგან საქმეთა მაშინდელ მინისტრს, ვანო მერაბიშვილს თვეში 50 ათას დოლარს უხდიდა. იგივე კომპანია „ოცნებამ“ გადაიბარა და… იმის მიუხედავად, რომ მერაბიშვილი ციხეში იჯდა, მისი წილი მაინც ირიცხებოდა და ირიცხება კონკრეტულ ანგარიშზე. ახლა არ დაიწყოთ, არ ხდება, ტყუილიაო, საუბარი ერთ-ერთი აზარტული თამაშების კომპანიაზე გვაქვს და თუ საჭიროა, დავასახელებთ კიდეც, ამიტომ მშვიდად წაიკთხეთ და შეირგეთ. „ოცნებისა“ და „ნაციონალების“ ინტერესები არაერთხელ გადაკვეთილა და მხარები ყოველთვის მორიგებულან, იმიტომ, რომ… ნაცებმა გაყოფა გადასარევად იციან და ძალიან უხარიათ, რომ „ოცნება“ მათ დარად, ბიზნესს ბოლომდე არ ახევს და მეპატრონეებს ციხეში არ უშვებს.
რაც შეეხება კონკრეტულად ამ ტენდერს. ლაშა ფურცხვანიძე და კახა კალაძე დიდი ხანია შეხმატკბილებულად მუშაობენ. ანუ, ეს კომპანია იგებს ტენდერებს და ასრულებს სამუშაოებს, ხოლო კალაძე ამ ყველაფრით კმაყოფილია. პატარ-პატარა ხარვეზები ადრეც იყო და ფურცხვანიძესთან პრეტენზიები ყოფილა, თუმცა იმდენად უმნიშვნელო, რომ თქმადაც არ ღირს. უმნიშვნელოში 10 და 20 ათას ლარიან ლაფსუსებს ვგულისხმობთ, რომელიც „მარტივად“ გვარდებოდა, ახლა კი…
ახლა რასაც გეტყვით, შესაძლოა არარეალურად მოგეჩვენოთ, მაგრამ… ამის გამო არავის დასჯიან. უფრო მეტად გაგიკვირდებათ, თუ ვიტყვით, რომ ყველაზე ნაკლები ბრალეულობა „გრინსერვის პლუსის“ დირექტორს, ლაშა ფურცხვანიძეს მიუძღვის, რადგან მისმა კომპანიამ შეასრულა სამუშაო, რომელიც ჩაიბარა მერიის რამდენიმე სამსახურმა და რაც მთავარია, საექსპერტო ბიურომ. მაშინ, ვინმე უნდა გამოვიდეს და თქვას, რომ ფურცხვანიძემ ჩაბარების სანაცვლოდ ფული გადაიხადა, რაც არარეალურია, რადგან მას ფული უნდა გადაეხადა მერიის ზედამხედველობის სამსახურისთვის, ქონების მართვის სამსახურისთვის, საექსპერტო ბიუროსთვის… კონკრეტული სამსახურები დაასაბუთებენ, რომ ჩაბარების პროცესში ყველაფერი რიგზე იყო. ჩაბარება კი ტრაგედიამდე ორი დღით ადრე მოხდა…
მეორეს მხრივ, ძალიან ძნელია იმის წარმოდგენა, რომ ასეთი ტრაგედიის ფონზე, შესაძლოა საერთოდ არავინ დაისაჯოს. პოლიტიკური პასუხისმგებლობის აღებას საქართველოში გადაჩვეულები ვართ, მაგრამ მედალს მეორე მხარეც აქვს და აქ სადაო საკითხია, უნდა დადგეს თუ არა პოლიტიკური პასუხისმგებლობის საკითხი. ადამიანურად, მორალურად, გასაგებია, მაგრამ როდის იყო, მორალი და ადამიანობას ქართულ პოლიტიკასთან კვეთაში იყო…
კომენტარები