„სხვა რომ აღზარდო, თავად უნდა იყო აღზრდილი“ – გია მურღულია

ფილოლოგი გია მურღულია სოციალურ ქსელში სტატუსს აქვეყნებს:

„ცხოვრების სულ 5 პრინციპი არსებობს:

1. “რასაცა გასცემ, შენია, რაც არა – დაკარგულია” (იცხოვრე სხვისთვის – ყველაზე მეტად ასე იზრუნებ საკუთარ თავზეც);

2. “ხელი ხელს ბანს…” (სამყაროს ნაცვალგება მართავს);

3. “გაიხარე, სვი და ჭამე” (ყველაზე ჭკვიანურია, დააგემოვნო წუთისოფელი);

4. “ჭეშმარიტია ის, რაც სასარგებლოა” (ყველაფერი იზომება და ფასდება ინდივიდისთვის სასურველი სიკეთით);

5. წაართვი და იბატონე (რა საჭიროა გარჯა, თუ შეიძლება სხვისი შრომის შედეგი მიითვისო?)

ხუთივეზე უსასრულოდ შეიძლება მსჯელობა, მაგრამ ახლა მოკლედ ვთქვათ: ადამიანი ან ალტრუიზმს ირჩევს, ან – ეგოიზმს, ანაც – სოციალურ სინერგიას, რომელიც პირველს ეყრდნობა და გამოხატავს.

არიან კიდევ “ნეიტრალები” (ნელთბილები), რომელთა ადგილი, დანტეს “ღვთაებრივი კომედიის” მიხედვით, არც სამოთხეშია და არც ჯოჯოხეთში.

ამას სკოლაში უნდა ვასწავლიდეთ, რადგან იქ, პირველ რიგში, ადამიანი ყალიბდება და არა ფიზიკოსი, ლიტერატორი, ბიოლოგი ან ისტორიკოსი.

ადამიანმა უნდა იცხოვროს – როგორ გააკეთებს ამას, მის ფიქრსა და განწყობაზეა დამოკიდებული, რომელთა შინაარსსა და ხარისხსაც აღზრდა განაპირობებს.

და ბოლოს – ტრივიალური ჭეშმარიტება, რომელიც მუდმივად სამტკიცებელია:

სხვა რომ აღზარდო (ამაზე დიდი მისია არ არსებობს), გონიერებასთან ერთად, თავად უნდა იყო აღზრდილი“.