საქართველოში უკრაინის ელჩმა, იგორ დოლგოვმა უკრაინაში არსებულ ვითარებასთან დაკავშირებით საგანგებო ბრიფინგი გამართა. ელჩმა აღნიშნა, რომ რუსული ჯარები დარტყმებს საცხოვრებელ სახლებზე ახორციელებენ კიევის იმ უბნებშიც, სადაც არავითარი სამხედრო ობიექტი არ არის განთავსებული.
მისივე თქმით, თავდასხმების შედეგად 35 უკრაინელი დაიჭრა, მათ შორის ორი ბავშვი.
“დღეს დილით, კიევის ცენტრის მახლობლად რუსეთის ჯარებმა დარტყმა განახორციელა საცხოვრებელი სახლების მიმართულებით, სადაც ცხოვრობს მშვიდობიანი მოსახლეობა. იქ არ არის სამხედრო ობიექტები ან რაიმე სამთავრობო დაწესებულებები, იქ არის ბაღები, სკოლები, საავადმყოფოები.
ბრძოლები მიმდინარეობს კიევის მახლობლად. აგრესორი ცდილობს შემოვიდეს კიევში ბელარუსის მხრიდან, სადაც მდებარეობს ჩერნობილის ობიექტი. არის აგრესორის მცდელობები, რომ გადმოსხას საჰაერო დესანტი დნეპრის სანაპიროზე, რომელიც ყოფს ორ ნაწილად ქალაქ კიევს.
კიევის მერმა ვლადიმერ კლიჩკომ დღეს მიმართა კიევის მოსახლეობას და შეატყობინა დანაკარგების შესახებ. ჩვენ გვყავს 35 დაჭრილი, მათ შორის ორი ბავშვი.
მინდა შეგახსენოთ, რომ დამნაშავე პუტინმა, სხვა სიტყვას ვერ ვპოულობ, გამოაცხადა სპეციალური ოპერაციის დაწყების შესახებ რომელიც უკავშირდება არაღიარებულ დონეცკისა და ლუგანსკის რესპუბლიკებში მდგომარეობას. ასევე, დაიწყო ომი ყველა შესაძლო მიმართულებით, სადაც იყო ფოკუსირებული რუსი ჯარი. ჩვენი ჯარი იბრძვის, ჩვენი მოსახლეობა ინარჩუნებს სიმშვიდეს”, – თქვა იგორ დოლგოვმა.
ელჩის ამბობს, რომ სხვადასხვა ქვეყნები, მათ შორის საქართველო უკრაინელებს აქტიურად უწევენ დახმარებას და ამისთვის მათ მადლობას უხდის. მისივე თქმით, პარტნიორები უკრაინას იარაღსა და საბრძოლო მასალას აწვდიან, თუმცა შექმნილ ვითარებაში ეს საკმარისი არ არის.
“უკრაინელთა ნაწილი, ვისაც სურდა თავისი საკუთარი შვილების სიცოცხლის გადარჩენა, გავიდნენ უკრაინის ფარგლებს გარეთ. ისინი არიან ლტოლვილები 21-ე საუკუნეში. ძალიან მადლიერი ვართ პარტნიორების და მეზობელი ქვეყნების, რომლებმაც შექმნეს ყველანაირი პირობა, რომ მიიღონ ჩვენი მოქალაქეები. შექმნილია პირობები ჩვენი მოქალაქეების განთავსებისთვის, ასევე მათ მიერ საზღვრის უპრობლემოდ გადაკვეთისთვის. ირლანდიამ გააუქმა სავიზო რეჟიმი უკრაინელებისთვის. ეს არის სოლიდარობა, საერთაშორისო და ჰუმანიტარული დახმარება.
მადლიერი ვართ ყველანაირი დახმარებისთვის, საქართველოშიც დიდ მხარდაჭერას ვგრძნობთ. ასეულობით და უფრო მეტი მოქალაქე ჩარჩა საქართველოში. საქართველოს მთავრობა ყველაფერს აკეთებს, რომ უკრაინელებს გაუწიოს დახმარება. მთავრობამ გახსნა ცხელი ხაზი უკრაინის მოქალაქეებისთვის აკეთებს ყველაფერს, რათა განათავსოს ისინი უფასოდ. გვიკავშირდებიან სასტუმროების მეპატრონეები და გვეკითხებიან, რით შეუძლიათ დახმარების გაწევა. ასეთი მაგალითები საქართველოში ბევრია და ბევრია მთელ მსოფლიოში.
ეს საკმარისია თუ არა ? – არა. ის რაც გუშინ გვეჩვენებოდა სანქციების ხისტ პაკეტად, დღეს უკვე არასაკმარისია. ის სატრანსპორტო საშუალებები საბრძოლო ტექნიკით, იარაღით და საბრძოლო მასალით, სამწუხაროდ, არ არის საკმარისი, რადგან მიმდინარეობს ომი. ძალიან გვჭირდება პირველადი დახმარების საშუალებები. ეს დახმარება მიდის უკრაინაში მსოფლიოს სხვადასხვა ქალაქებიდან და მიმართულებიდან”, – თქვა ელჩმა.
კომენტარები