მედიის ყურადღების ცენტრში დღეს რუსთავის სასჯელაღსრულების მეორე დაწესებულებაა, სადაც ნაციონალური მოძრაობის თავმჯდომარე ნიკა მელიაა მოთავსებული. ნიკა მელიასთან შეხვედრას სალომე სამადაშვილი აპირებს. პოლიტიკოსი, რომელიც ერთადერთია ენმ-დან, ვინც ევროპული საბჭოს პრეზიდენტის შარლ მიშელის მიერ საქართველოს პოლიტიკური კრიზისის მოგვარების მიზნით შემუშავებულ დოკუმენტს მოაწერა ხელი.
ენმ-ს პატიმრობაში მყოფ თავმჯდომარესთან საუბრის მთავარი თემა მისი საპყრობილიდან გამოსვლის გზები იქნება, როგორც ცნობილია ნიკა მელია უარს ამბობს, როგორც შეთანხმების დოკუმენტით შეთავაზებულ ამნისტიაზე, ასევე გირაოს გადახდაზეც. ნიკა მელიას თქმით, მას არ სურს, რომ ამნისტია 20 ივნისის მოვლენებში მონაწილე იმ პირებსაც შეეხოთ, რომელთა ქმედებების შედეგადაც ადამიანები დასახიჩრდნენ.
თუმცა ნიკა მელიას განცხადებით, მსგავსი ამნისტიის თავიდან აცილების მიზნით, ის მზადაა კომპრომისზე წავიდეს და დათანხმდეს ევროკავშირის მიერ გირაოს გადახდას.
ნიკა მელიასთან შეხვედრისას საუბარი სავარაუდოდ შეეხება სალომე სამადაშვილის სამომავლო გეგმებსაც. ჯერ კიდევ “ერთიანი ნაციონალური მოძრაობის” წევრი სალომე სამადაშვილი ამბობს, რომ ის პარტიას მელიას ციხიდან გამოსვლის შემდეგ ოფიციალურად დატოვებს.
კომენტარები