“სააკაშვილს არცერთხელ არ უთქვამს უარი სამედიცინო დახმარებაზე” – იუსტიციის მინისტრი

იუსტიციის მინისტრი რატი ბრეგაძემ რუსთავი 2-ის ეთერში განაცხადა,რომ მიხეილ სააკაშვილს მთელი პატიმრობის მანძილზე არცერთხელ არ უთქვამს უარი სამედიცინო დანიშნულებაზე და გავრცელებული ინფორმაცია იმის შესახებ, თითქოს ის უარს აცხადებს ექიმების რეკომენდაციების შესრულებაზე, ამომრჩევლის ნებით მანიპულაციის ნიმუშია.

„რაც შეეხება განცხადებას, რომ მან  შეწყვიტა მკურნალობა და უარი თქვა მკურნალობის გაგრძელებაზე, არის მტკნარი სიცრუე და ძალიან სამწუხაროა, როდესაც საზოგადოება შეჰყავთ შეცდომაში და ატყუებენ საკუთარ ამომრჩეველს, პირველ რიგში, და შემდეგ – დანარჩენ საზოგადოებას”, – აღნიშნა რატი ბრეგაძემ.

იუსტიციის მინისტრმა აღნიშნა ასევე, რომ მსჯავრდებული სააკაშვილი ასრულებს ექიმების ყველა რეკომენდაციას იმისათვის, რომ შეინარჩუნოს ჯანმრთელობა და ენერგია; სხვადასხვა განცხადება კი, რაც კეთდება, მიზნად ისახავს ამომრჩევლის ნებით მანიპულაციას.

„ეს არის კიდევ ერთი ძალიან დიდი ტყუილი, რომ მოატყუონ საკუთარი ამომრჩეველი, მოახდინონ მანიპულირება მათ საარჩევნო ნებაზე… ჩვენ ვიხილეთ დღეს სხვადასხვა პოლიტიკოსის განცხადება, რომლებიც ეუბნებოდნენ ამომრჩევლებს, რომ ვინც კი ხმას მისცემს სხვა ძალას, ის ხელს აწერს სააკაშვილის მკვლელობას. ეს არის სრული ძალადობა საზოგადოებაზე”, – განაცხადა რატი ბრეგაძემ.

მან ასევე ხაზი გაუსვა იმას, რომ მსგავსი ცრუ ინფორმაციის გავრცელება არჩევნების მეორე ტურის წინ საზოგადოების შეცდომაში შეყვანისკენ არის მიმართული.

მინისტრის თქმით „მაინცადამაინც არჩევნების წინა დღეს პატიმარმა თითქოსდა უარი ითქვა მკურნალობაზე – ამ განცხადებიდან ნახევარი საათის განმავლობაში მან ისარგებლა სამედიცინო მომსახურებით და მიიღო აბსოლუტურად ყველა ის სითხე, პრეპარატი და აბი, რასაც იღებდა წინა დღეების განმავლობაში”.