“სააკაშვილის მოწოდებაა, ციხეს ადამიანების მასა მიაწყდეს, აჯანყება მოაწყოს, გამოიყვანოს ციხიდან და რევოლუციით რიგგარეშე არჩევნებს მიაღწიოს,” – განაცხადა საპარლამენტო უმრავლესობის წევრმა, გურამ მაჭარაშვილმა ჟურნალისტებთან საუბრისას.„თქვენი მხრიდან კითხვა იყო, რომ დაგვესახელებინა, მიხეილ სააკაშვილმა როდის თქვა, რომ მას სურს, რევოლუცია ან აჯანყება. ამას ვეღარ მალავს და პირდაპირ ამბობს, რომ ციხიდან გამომიყვანეთ და რიგგარეშე არჩევნებს დავნიშნავო. გამომიყვანეთ ციხიდან რას ნიშნავს? მის მიმართ კანონიერი გადაწყვეტილება არსებობს და ერთადერთი მისი შეწყალება პრეზიდენტს შეუძლია, რომელიც ამაზე უარს ამბობს.
ანუ, იმას გულისხმობს, რომ ციხეს ადამიანების მასა მიაწყდეს, აჯანყება და რევოლუცია მოაწყოს და ასე გამოიყვანოს ციხიდან და რევოლუციით რიგგარეშე არჩევნებს მიაღწიოს. ამით პირდაპირ საზოგადოებას მოუწოდა, არაკანონიერად შეიკრიბონ და ციხიდან არაკანონიერი გზით დაიხსნან,“ – განაცხადა გურამ მაჭარაშვილმა.
ცნობისთვის, მიხეილ სააკაშვილმა ორი დღის წინ ციხიდან მორიგი წერილი გამოაგზავნა, სადაც ნათქვამია, რომ თუ მოხდება მისი ციხიდან დახსნა 10 დღეში რიგგარეშე საპარლამენტო არჩევნების დანიშვნა მოხერხდება და ბიძინა ივანიშვილს ბეჭებზე დაცემენ.
კომენტარები