პროტესტის ნიშნად, Formula 1-ის ოთხგზის ჩემპიონი, სებასტიან ვეტელი რუსეთში დაგეგმილ გრან-პრიში მონაწილეობას არ მიიღებს.
გერმანელი მრბოლელის თქმით, რუსეთის სამხედრო აგრესია და უკრაინაზე თავდასხმა მისთვის მიუღებელია, რის გამოც ის უარს აცხადებს სოჭის ტრასაზე დაგეგმილ რბოლაში მონაწილეობაზე, რომელიც 25 სექტემბერსაა დაგეგმილი.
“ამ დილით შოკისმომგვრელი ამბავი შევიტყვეთ, იქ [უკრაინაში] რაც ხდება, ნამდვილი საშინელებაა. თუ Formula 1-ის კალენდარს გადახედავთ, ნახავთ, რომ 25 სექტემბერს რუსეთში რბოლა გვაქვს დაგეგმილი. ჩემი პირადი მოსაზრებაა, რომ იქ არ უნდა წავიდე და არც წავალ – გადაწყვეტილება უკვე მიღებულია. რუსეთში რბოლა არასწორია”. – თქვა ვეტელმა პრესკონფერენციაზე.
აღსანიშნავია, რომ რუსეთის აგრესიის მიმართ პროტესტს გამოხატავს Formula 1-ის მოქმედი ჩემპიონიც, მაქს ვერსტაპენი.
“არ არის სწორი ჩაატარო რბოლა იმ ქვეყანაში, რომელიც ომშია”. – თქვა ვერსტაპენმა.
საგულისხმოა, რომ რუსეთის გრან-პრის ხშირად ესწრება პრეზიდენტი ვლადიმირ პუტინი და რბოლაში გამარჯვებულებს თავადვე გადასცემს ხოლმე ოქროს თასს.
ზუსტად რა გადაწყვეტილებას მიიღებს FIA და გაუქმებდა თუ არა სოჭის გრან-პრი, ჯერჯერობით, უცნობია.
კომენტარები