რუსეთი არ წყვეტს, ვინ გახდება ან არა ნატოს წევრი, ამას ალიანსის 30 წევრი წყვეტს, – განაცხადა ნატოს გენერალურმა მდივანმა, იენს სტოლტენბერგმნა.
„ალიანსის წევრებმა ეს პრინციპი მკაფიოდ დააფიქსირეს. პატივი უნდა ვცეთ ევროპაში თითოეული ქვეყნის უფლებას თავად აირჩიოს საკუთარი გზა. ფინეთი და შვედეთი ნატოს ახლო პარტნიორები არიან, თუმცა ნატოში გაწევრიანებაზე განაცხადს არ აკეთებენ. ამასთანავე მათ მკაფიოდ განაცხადეს, რომ ნატო ხელს ვერ მოაწერს იურიდიულად სავალდებულო შეთანხმებას არგაფართოების შესახებ. ეს პრინციპი არა მხოლოდ ნატოს წესდებაში, არამედ ჰელსინკის საბოლოო აქტშიცაა გაწერილი“, – აღნიშნა იენს სტოლტენბერგმა.
მისივე თქმით, როგორც ჩანს, რუსეთი აგრძელებს სამხედრო ძალების გაძლიერებას. იენს სტოლტენბერგის განცხადებით, იმედი აქვთ, რუსეთი ჩაერთვება დიალოგში და კონფრონტაციის ნაცვლად დიპლომატიას აირჩევს.
„ჩვენ ჯერჯერობით ვერ ვხედავთ ადგილზე დეესკალაციას. პირიქით, როგორც ჩანს, რუსეთი აგრძელებს სამხედრო ძალების გაძლიერებას. ამასთან, ჩვენ არ მიგვიღია პასუხი 26 იანვარს რუსეთისთვის გაგზავნილ წერილობით წინადადებებზე, რომლებიც ასახავს საკითხებს, სადაც ნატო-ს მოკავშირეები მზად არიან, დასხდნენ რუსეთთან ერთად და შეეცადონ, იპოვონ პოლიტიკური გზა. ჩვენ გავაგრძელებთ რუსეთისთვის მკაფიო შეტყობინების გაგზავნას, რომ მზად ვართ, დავსხდეთ და მათთან ერთად განვიხილოთ, თუმცა ამავდროულად მზად ვართ უარესისთვის. და თუ რუსეთი კიდევ ერთხელ შეიჭრება უკრაინაში, მათ ძვირი საფასურის გადახდა მოუწევთ. ჩვენ გავაგრძელებთ რუსეთის ქმედებების და გეგმების გამოვლენას, რათა გაურთულდეთ უკრაინის წინააღმდეგ აგრესიული ქმედებების გახორციელება. მაგრამ ჩვენ ვიმედოვნებთ, რომ რუსეთი ჩაერთვება მნიშვნელოვან დიალოგში და კონფრონტაციის ნაცვლად დიპლომატიას აირჩევს. ჩვენ მზად ვართ, დავსხდეთ და ვიპოვოთ პოლიტიკური გამოსავალი“, – განაცხადა იენს სტოლტენბერგმა.
კომენტარები