საქართველოს გასტრონომიის ასოციაციის დირექტორი, ლევან ქოქიაშვილი, სოციალურ ქსელში, წერს:
“4 თებერვალს პრემიერის მიერ რეგულაციების შემსუბუქების გაკეთებული განცხადებების საპასუხოდ გვინდა გაგიზიაროთ ჩვენი პოზიცია:
ეს იყო სარესტორნო ბიზნესის მოთხოვნების დაკმაყოფილების იმიტაცია!
ვთვლით, რომ ხელისუფლების მხრიდან ადგილი ჰქონდა ჩვეულ მანევრს, რისი მიზანიც იყო ნაწილობრივ, პროტესტის მუხტის ჩაქრობა და ნაწილობრივ, ეპიდემიოლოგიურ ვითარებაზე დაკვირვების მცდელობა.
ჩვენი მთავარი კითხვები ისევ პასუხგაუცემელია.
ველოდებით რეალურ გეგმას. აქვე ვაცხადებთ , რომ თუ ამ გეგმის შესაქმნელად მთავრობაში არ არსებობს კომპეტენტური ინსტიტუცია, მზად ვართ დავეხმაროთ მათ და შევიმუშაოთ კრიზისიდან გამოსვლის ეფექტური, დარგის წარმომადგენლების და სპეციალისტების მიერ შემუშავებული გეგმა.
ვიზიარებთ პანდემიის შედეგად დაზარალებული ყველა სხვა სექტორის პროტესტს, მათ შორის: ფიტნესის ცენტრების, ბავშვთა გასართობი ცენტრების, მუსიკოსების, თეატრების და ა.შ.
მხარს ვუჭერთ აღნიშნულ სექტორებში რეგულაციების მოხსნას და ქვეყნის ეკონომიკის სრულად ამოქმედებას. ჩვენ მათთან ერთად ვიქნებით საბოლოო შედეგების მიღწევამდე!
• ვუერთდებით 6 თებერვლის საპროტესტო აქციას!
• ვუერთდებით “კომენდანტის საათის” დროს დაუმორჩილებლობის მსვლელობას.
ჩვენი სექტორის მოთხოვნებია:
◦ შაბათ-კვირას დაკეტვის შეზღუდვის მოხსნა;
◦ კომენდანტის საათის გაუქმება ან გადაწევა 12:00 საათამდე ;
◦ შიდა სივრცების გახსნა ;
◦ 2 წლიანი საგადასახადო შეღავათები ;
• თანამშრომლების ძველი ხელფასების კომპენსანცია სრულ გახსნამდე ;
◦ ბანკებთან შუამდგომლობა და დაბალპროცენტიანი სესხები.
ვითხოვთ , ერთი კვირის განმავლობაში ხელისუფლებამ წარგვიდგინოს კრიზისიდან გამოსვლის გრძელვადიანი გეგმა და დააკმაყოფილოს ჩვენი სექტორის ყველა მოთხოვნა.
აღნიშნულის არ შესრულების შემდეგ გაგიზიარებთ ჩვენს შემდგომ ნაბიჯებს.
კომენტარები