“კოვაქს” პლატფორმის განმარტებით, საქართველომ Pfizer-ის ვაქცინა თებერვალში ვერ მიიღო, რადგან მათ მიერ მოთხოვნილი კრიტერიუმები ვერ დააკმაყოფილა. პლატფორმა ელის, რომ გზავნილების ძირითადი ნაწილი მარტში განხორციელდება. ამ თემაზე მათ “ინტერპრესნიუსს” განუცხადეს.
“თებერვლის ბოლოს ნაადრევი გზავნილები იმ ქვეყნებში განხორციელდა, რომლებმაც ჩვენს მიერ ერთიან განცხადებაში კრიტერიუმები უკვე დააკმაყოფილეს. დამატებითი ინფორმაცია პირველი გზავნილების შესახებ ყველა მონაწილეს მომდევნო დღეებში ეცნობება, ინფორმაცია ასევე გამოქვეყნდება ონლაინ”, – აღნიშნავს კოვაქს პლატფორმა გამოცემასთან საუბრისას.
რაც შეეხება კრიტერიუმებს, “კოვაქს” პლატფორმა ითხოვს:
- ყველა მონაწილე ქვეყნის ეროვნულმა რეგულატორმა ავტორიზება უნდა მისცეს შემოსატან ვაქცინას;
- ყველა მონაწილემ ვაქცინის მწარმოებლებთან უნდა გააფორმოს ზარალის ანაზღაურების კონტრაქტი.
შეგახსენებთ, ვაქცინაციის პროცესის დაწყება ყოფილმა პრემიერმა თებერვლის შუა რიცხვებისთვის დააანონსა, მაგრამ ამ დრომდე ვაქცინები შემოტანილი არ არის. ვაქცინაცია მსოლფიოს 100-ზე მეტ ქვეყანაში უკვე მიმდინარეობს, თუმცა ზუსტი თარიღი, თუ როდის დაიწყება ის საქართველოში უცნობია.
იმაზე, რომ საქართველო ვერ აკმაყოფილებდა კრიტერიუმებს, ბევრი ექიმი წერდა, თუმცა, ამირან გამყრელიძე და ჯანდაცვის მინისტრი ამას კატეგორიულად უარყოფდნენ.
ყველაზე უფრო ცუდი ისაა, რომ მოსახლეობამ “კოვაქს” პლატფორმის პასუხი მედიისგან გაიგო და არა სახელმწიფო უწყებებისგან.
“ალია” შეგახსენებთ იმასაც, რომ როცა ექიმების ნაწილი წერდა და ღიად ამბობდა, რომ ვაქცინას ვერ მივიღებთ, რადგან საქართველოს მთავრობა არც კი ცდილობდა ვაქცინის მიღებას, ექიმთა მეორე ნაწილი, რომლებიც დღეს უკვე თავადაც ითხოვენ პასუხისმგებლობის დაკისრებას მთავრობისთვის, აცხადებდნენ მტკიცებით ფორმაში, რომ ვაქცინის შემოსატანად საქართველოს ხელისუფლება ყველაფერს აკეთებს – რის საფუძველზე გვაიმედებდნენ და გვაჩუმებდნენ მაშინაც უცნობი იყო და ახლაც უცნობია!
ის ფაქტი, რომ ჯანდაცვის მინისტრმა და დაავადებათა კონტროლის ცენტრის ხელმღვანელმა დაგვიმალეს ნამდვილი მიზეზი, რატომ ვერ მიიღო ქვეყანამ ვაქცინა – არა მხოლოდ პოლიტიკურად, სამართლებრივად უნდა იყოს შეფასებული!
სულ 2 საბუთი იყო ხელმოსაწერი და კიდევ ერთხელ გავიხსენებთ თენგიზ ცერცვაძესთან ინტერვიუს, როდესაც მან გვითხრა, რომ პროტოკოლი შემუშავებულია და მინისტრის ხელმოწერას ელოდებიან, ერთი შეხედვით, ისე ჩანს, რომ მინისტრს საბუთები არ უყვარს, მაგრამ არც ასე მარტივადაა საქმე…
მაშინ, როცა ქვეყანა ჩაკეტეს და ვაქცინით გვაიმედებდნენ, “კოვაქსის” პასუხი დაგვიმალეს და ვისმენდით განცხადებებს, როგორ წუხს “კოვაქსი”, რადგან ჩვენი ვაქცინა მდიდარმა ქვეყნებმა წაიღეს, თურმე, ამირან გამყრელიძე, პირადად ამუნათებდა მდიდარ ქვეყნებს და პირდაპირ რომ ვთქვათ, ადანაშაულებდა კიდეც…
ამირან გამყრელიძე – “დღეს ვაქცინებით ძირითადად იცრებიან და დიდი მოცვა აქვთ მდიდარ ქვეყნებს, როცა საშუალო და დაბალგანვითარებული ქვეყნებისთვის, სამწუხაროდ, ამ საერთაშორისო მექანიზმებით არ ხდება.”
საქმე კი, ამასობაში, სულ სხვაგვარად ყოფილა, პრინციპში, როგორც ყოველთვის…
რატომ ვერ მივიღეთ სინამდვილეში ვაქცინა? – კოვაქსის პასუხით თუ ვიმსჯელებთ, უბრალოდ, არ გვინდოდა, თორემ, სულ 2 საბუთი იყო მოსამზადებელი…
რა თქმა უნდა, ტიკარაძეს და გამყრელიძეს შეუძლიათ თქვან, რომ “კოვაქსი” იტყუება და მათი განცხადება სიმართლეს არ შეესაბამება, თუმცა, ამის ნაცვლად, დღეს, როცა სრულიად ბუნებრივად გავრცელდა ინფორმაცია, რომ ამირან გამყრელიძე თანამდებობას ტოვებს და სრულიად ალოგიკურად, ჯერ კიდევ არ გავრცელებულა ინფორმაცია, რომ ტიკარაძეც იღებს პასუხისმგებლობას და თანამდებობას ტოვებს, გამყრელიძემ განაცხადა შემდეგი – “მუშაობას ვაგრძელებ ჩვეულ რეჟიმიში!” – დიახ, ბატონო, რეჟიმს არ გადაუხვიოთ!
არის თუ არა სინამდვილეში ფული მართლაც გადარიცხული “კოვაქსისთვის” და რა ბედი ეწევა იმ თანხას? – ამ კითხვაზე ჯერ პასუხი არ გვაქვს.
კომენტარები