სამხედრო ექსპერტი გიორგი თავდგირიძე მიიჩნევს, რომ რუსეთ-უკრაინის ომის მიმდინარეობაში ახალი ეტაპი იწყება. ამის შესახებ თავდგირიძე სოციალურ ქსელში წერს. მისი თქმით, ახლა ნატო და პარტნიორები უკრაინის შეიარაღებული ძალების საფუძვლიან გადაიარაღებასა და აღჭურვას იწყებენ, რაც უკრაინის წარმატების რეალურ იმედებს აჩენს.
„როგორც ჩანს, ნატო და პარტნიორები. თვლიან რომ დასრულდა რუსეთის შეტევის მოსაგერიებლად საჭირო პირველადი საჭიროების იარაღით უკრაინის მომარაგების ეტაპი. იწყება უკრაინის შეიარაღებული ძალების საფუძვლიანი გადაიარაღება და აღჭურვა.
მისაწოდებელი და დაპირებული შეიარაღების სიები აჩენს რეალურ იმედს, რომ რამდენიმე კვირაში რუსეთს დაუპირისპირდება ნატოს შემტევ საბრძოლო სისტემებით აღჭურვილი ძლიერი უკრაინული არმია, რომელსაც არ ექნება რიცხოვნობის პრობლემა, რომლის გენერალიტეტმა დაამტკიცა სტრატეგიული და ოპერატიული დაგეგმარების კარგი უნარი, ოფიცრებმა ბრძოლის მართვის საუცხოო ცოდნა და ჯარისკაცებმა მაღალი გაწვრთნილობა.
უკრაინის მთავრობამ და ხალხმა დაიმსახურა პატივისცემა ვაჟკაცური ბრძოლით, ისინი ბრძოლის ველზე მოიპოვებენ მომავალ მშვიდობას რომელიც გარანტირებული იქნება ძალით და არა უძლურებით. თავისუფლებისთვის ბრძოლით მოპოვებული მშვიდობა გაცილებით მყარია, ვიდრე მშვიდობისათვის დათმობილი თავისუფლებით არსებობა,“- წერს გიორგი თავდგირიძე.
კომენტარები