მედიაში გავრცელებულმა პოლიციელის მხრიდან შშმ მოზარდზე ძალადობის კადრებმა, საქართველოს არც თუ შორეული წარსული გაახსენა ანალიტიკოს არჩილ გამზარდიას.
გამზარდია 1990-იან და 2000-იან წლებთან ავლებს პარალელებს და წერს, რომ წლებისა და პოლიტიკური ეპოქების ცვლილების მიუხედავად, სისტემაში ერთი და იგივე სისასტიკე ტრიალებს.
„90-იანი წლები გარღვეული ჯიბეებით დავდიოდით მაშინდელი მოზარდი თაობა, რომ მილიციელს ჯიბეში არაფერი ჩაეგდო და განყოფილებაში ჯერ წიხლქვეშ არ გავეგდეთ, მერე ფულის ჩატანა არ მოეთხოვათ.
მე წყნარი, მშვიდი ადამიანი ვიყავი, მაგრამ მაშინდელ უბნელ-ინსპექტორებსა თუ მეტროში მყოფი პოლიციელების დიდ ნაწილს ეს სულ არ ადარდებდა. ყოველი სახლიდან გასვლა საფრთხე იყო ჩვენთვის როგორც კრიმინალებისგან, ასევე ე.წ. სამართალდამცავებისგანაც.
2000-იანებში, საკმარისი იყო, პოლიციელს რამე არ მოსწონებოდა, ეგრევე გემუქრებოდა, თუ წინააღმდეგობას გაუწევდა ვინმე, არც ცემას აკლებდნენ და არც ფულის ახევას, რომელსაც ფორმალურად გირაო ან საპროცესო შეთანხმება ერქვა. ვისაც ფული არ ჰქონდა, ვერც სესხად იღებდა და ვერც უგროვებდნენ, ციხის სისასტიკეში ხვდებოდა. კრიმინალის ნაკლებად გეშინოდა ქუჩაში გასულ ადამიანს, მაგრამ ხშირად ეს ფუნქცია თავად სისტემას ჰქონდა “შეთავსებული”.
ბოლო წლები კი რაღაც ნაზავი იქმნება 90-იანებისა და 2000-იანებისა. ძლიერდება კრიმინალიც და ძალოვანთა უსამართლო სისასტიკეც. წლების და პოლიტიკური ეპოქების განმავლობაში ტრიალებს ერთი და იგივე, ზოგჯერ ფორმა ეცვლება, მაგრამ არა არსი,”- წერს არჩილ გამზარდია სოციალურ ქსელში.
ცნობისათვის, გავრცელებულ ვიდეოჩანაწერების საფუძველზე, სადაც ასახულია, რომ მეტროპოლიტენში პოლიციელი შშმ პირზე ძალადობს, შინაგან საქმეთა სამინისტროს ორი თანამშრომელი დააკავეს.
სახელმწიფო ინსპექტორის სამსახურის ინფორმაციით, დაკავებულია შინაგან საქმეთა სამინისტროს საპატრულო პოლიციის დეპარტამენტის მეტროპოლიტენის სამმართველოს მე-3 ოცეულის პატრულ-ინსპექტორი ნ.ბ., ხოლო სამსახურებრივი უფლებამოსილების ბოროტად გამოყენების ბრალდებით დაკავებულია ამავე სამმართველოს მე-3 ოცეულის პატრულ-ინსპექტორი კ.ბ.
კომენტარები