საქართველოს ჟურნალისტური ეთიკის ქარტიის საბჭომ ბიზნესმენ გიორგი კაპანაძის განცხადებასთან დაკავშირებით გადაწყვეტილება გამოაქვეყნა.
საბჭომ დაადგინა, რომ კაპანაძის შესახებ ტელეკომპანია “ფორმულას“ მიერ მომზადებულ რეპორტაჟში დარღვეულია ჟურნალისტური ეთიკის ქარტიის პირველი პრინციპი, რაც გულისხმობს შემდეგს: „ჟურნალისტმა პატივი უნდა სცეს სიმართლეს და საზოგადოების უფლებას – მიიღოს ზუსტი ინფორმაცია“.
სადავო მასალის სათაურია – „200 მილიონიანი ტენდერი „ოცნებასთან” აფილირებული კომპანიისთვის”.
აღნიშნული კომპანია (საბა ქონსთრაქშენი) რეპორტაჟში ბიზნესმენ გიორგი კაპანაძესთან აქვთ დაკავშირებული, ხოლო ჟურნალისტის მიერ ჩაწერილი ოპოზიციონერი დეპუტატი ვარაუდობს, რომ “ეს თანხა შავი ფულია, რომელსაც მმართველი გუნდი საარჩევნოდ გამოიყენებს”.
გიორგი კაპანაძის წარმომადგენლის პოზიციით, ეს ინფორმაცია არასწორია და ჟურნალისტს იგი არ გადაუმოწმებია. მისი თქმით, აღნიშნული ფრაზით ჟურნალისტი ფაქტის სახით აცხადებს, რომ შპს „საბა კონსტრაქშენის“ მფლობელი გიორგი კაპანაძეა, რაც სიმართლეს არ შეესაბამება.
თავის მხრივ, მოპასუხე აღნიშნავს, რომ მასალა ეთერში გავიდა არა როგორც სიუჟეტი, არამედ რეპორტაჟი.
„რაც შეეხება კონტექსტს, რა კონტექსტშიც განმცხადებელი, გიორგი კაპანაძე იქნა ნახსენები, იგი მოხსენიებულია ერთხელ და საუბარია მასზე, როგორც არა კონკრეტული შპს-ის მფლობელზე, არამედ შპს-ს შესაძლო კავშირის კონტექსტში ქართულ ოცნებასთან და ასევე, ბიზნესმენ გიორგი კაპანაძესთან“, – მიიჩნევდა მოპასუხე მხარე.
თავის მხრივ, ქარტიის საბჭომ ჟურნალისტური პროდუქტი გაანალიზა აუდიტორიის პოზიციიდან და შეეცადა დადგენას, რამდენად სცა ჟურნალისტმა პატივი საზოგადოების უფლებას, მიიღოს ზუსტი ინფორმაცია.
“გადამოწმების შემადგენელი ნაწილია ბალანსი, ბრალდების ობიექტის საპასუხო კომენტარის მოპოვება, ყველა რელევანტურ წყაროსთან ინფორმაციის დაზუსტება. მასალაში არ ჩანს გიორგი კაპანაძის პოზიცია. ამასთან, ჟურნალისტურ პროდუქტში გავრცელებული ინფორმაცია ეყრდნობა მხოლოდ ერთ წყაროს“, – ნათქვამია ქარტიის გადაწყვეტილებაში.
საბჭომ დარღვეულად არ მიიჩნია ქარტიის მესამე და მე-11 პრინციპები, ხოლო პირველი პრინციპის დარღვევა დაადგინა.
კომენტარები