ქართველი მოდელი ფოტოგრაფს სექსუალურ შევიწროებაში ადანაშაულებს

კონკურსი „მის კავკასია 2021,“ რომელიც 2021 წლის ზაფხულში თბილისში იმართება, სკანდალში ეხვევა.
ახალგაზრდა მოდელი სალი ჩხიკვაძე კონკურსის ოფიციალურ წარმომადგენლებს და კონკრეტულად ირანელ ფოტოგრაფ ჰუმან ზაჰედის სექსუალურ შევიწროებაში დებს ბრალს.

„მოგეხსენებათ საქართველოა და ამაზე აქამდე საჯაროდ არავინ ხმას არ იღებდა, მაგრამ მე არ ვაპირებ გაჩუმებას. საკუთარ ქვეყანაში მინდა თავს დაცულად ვგრძნობდე და ვიცოდე, რომ ირანელი ტურისტი ვერც ჩემი და ვერც სხვა ქართველი გოგოების შევიწროებას ვერ შეძლებს, ვერც ფსიქოლოგიურად და ვერც ფიზიკურად,“- წერს მოდელი სოციალურ ქსელში.

სალი ჩხიკვაძე ამბობს, რომ ჰუმან ზაჰიდის შესახებ, როგორც შანტაჟისტისა და  მოდელი გოგონების შემავიწროებელის შესახებ ინფორმაციას დიდი ხანია ფლობდა.
„გაგონილი მქონდა, რომ ავიწროებს მოდელებს სექსუალურად და აშანტაჟებს მათ ფოტოებით, მანამდე ჩემთვისაც ჰქონდა მოწერილი მაგრამ რომ შეხედა რომ არ გავდიოდი, ჩარია სოფია (კონკურსის ორგანიზატორი სოფია გურეშიძე)  და მისი დახმარებით “მიმიტყუა” გადაღებაზე…გადამიღო ფოტოები რომლებსაც არ მიგზავნიდა, როცა ვთხოვე რომ გამოეგზავნა მითხრა რომ მხოლოდ იმ შემთხვევაში გამომიგზავნიდა თუ მასთან ავიდოდი, მის პირად სახლში და გვიანობამდე დავრჩებოდი რადგან ბევრი ფოტო იყო და ამდენს ინტერნეტში ვერ გამოაგზავნიდა,“- წერს მოდელი.

სალი ჩხიკვაძე აფრთხილებს ახალგაზრდა მოდელებს, გაითვალისწინონ მისი გამოცდილება და თავი შორს დაიჭირონ ირანელი ფოტოგრაფისაგან.
„ეს ადამიანი არის პროფესიას ამოფარებული მანიაკი\მოძალადე, რომელიც ცდილობს პროფესიის გამოყენებით დაამყაროს სექსუალური კავშირი მოდელებთან და როცა საწადელს ვერ აღწევს გადადის მათ განადგურებაზე და გამწარებაზე…
რატომ დავწერე ეს ყველაფერი, იმ ზიანს რაც მე მან მომაყენა უკვე ვეღარავინ აანაზღაურებს, მაგრამ უბრალოდ მინდა ყველამ გაიგოს რომ საქართველოში აპირებენ ჩაატარონ “miss caucasus” სილამაზის კონკურსი, რომელსაც გეგმავს არაპროფესიონალების გუნდი სადაც ერთ-ერთი მთავარი პირი არის სწორედ ჰუმან ზაჰედი, მე თავს ვთვლი ვალდებულად რომ ყველა გოგო რომელიც ამ კონკურსის ქასთინგზე მივა წინასწარ იყოს გაფრთხილებული თუ რა საფრთხის წინაშე შეიძლება დადგნენ თუ ამ ადამიანებთან ექნებათ შეხება (სოფია გურეშიძე, ჰუმან ზაჰედი) რადგან არ მინდა, რომ გოგონებმა, რომლებიც იქ მივლენ იგივე გამოიარონ რაც მე გამოვიარე, შესაძლოა მივიდნენ არასრულწლოვნები, რომლებსაც ნაკლებად შეუძლიათ თავის დაცვა, ამიტომ გოგოებო გთხოვთ გვერდში დავუდგეთ ერთმანეთს,“- წერს მოდელი.

სალი ჩხიკვაძის ფეისბუქ პოსტს მოდელი გოგონები ეხმაურებიან და ერთმანეთს მოუწოდებენ დაარეპორტონ ფოტოგრაფის ოფიციალური ფეისბუქ გვერდი.
ჩხიკვაძეს  თანადგომას უცხადებს მოდელი ნინო ორდენიძეც.
სალომე, მადლობა შენ რომ ეს ყველაფერი ესე საჯაროდ დაწერე. ამით ძალიან ბევრი გოგო აცდება ამ კოშმარს! ყველას არ აქვს იმის უნარი რომ ეს თქვას და ყველა ვერ იცავს თავის თავს! მიმაქვს შენი პოსტი და შენ ხარ ოქრო,“- წერს ორდენიძე.

 რაც შეეხება კონკურსს, „მის კავკასია 2021-ის“  მოსამზადებელი პერიოდი აქტიურად გრძელდება და ჰუმან ზაჰედი კვლავ იწვევს ახალგაზრდა მოდელებს კონკურსში მონაწილეობის მისაღებად.